ދަ ވީކްއެންޑްގެ އާ އަލްބަމް: ސެލީނާ ދެކެ ލޯބިވެވުމަކީ ކުށެއް؟

ނިމިގެންދިޔަ ހަފްތާގައި ކެނެޑާއަށް އުފަން އެބެލް ޓެސްފަޔޫ ނުވަތަ "ދަ ވީކްއެންޑް"ގެ އާ އަލްބަމެއް ވަނީ ރިލީޒްކޮށްފައެވެ.

ހަ ލަވަ ހިމެނޭ މި އެކްސްޓެންޑެޑް ޕްލޭ (އީޕީ) އަލްބަމަށް ކިޔަނީ "މައި ޑިއަރ މެލަންކޮލީ" އެވެ. މި އަލްބަމްގައި ހިމެނޭ ލަވަތަކަކީ، "ކޯލް އައުޓް މައި ނޭމް،" "ޓްރައި މީ،" ވޭސްޓެޑް ޓައިމްސް،" "އައި ވޯޒް ނެވަރ ދެއަރ،" "ހަރޓް ޔޫ" އަދި 'ޕްރިވިލެޖް" އެވެ.

"މައި ޑިއަރ މެލަންކޮލީ" ވެގެން ދިޔައީ ފޭނުންނަށް ސަޕްރައިޒްއަކަށެވެ. ނަމަވެސް، ސަޕްރައިޒަކަށްވީ ހަމައެކަނި އަލްބަމެއް ކުއްލިއަކަށް ރިލީޒް ކުރުމެއް ނޫނެވެ. އާންމުކޮށް އަމިއްލަ ދިރިއުޅުމުގެ ކަންތައް ހާމަކޮށް ނޫޅޭ ދަ ވީކްއެންޑްގެ ހިތުގެ ވޭންތައް ފޭނުންނަށް ކިޔައިދިން ފަދައެވެ.

"ޔަންގް" ހޮލީވުޑް ތެރޭގައި 2017 ވަނަ އަހަރުގައި އެންމެ ހޫނުކޮށް މަޝްވަރާ ކުރެވުނު އެއް ވާހަކައަކީ ދަ ވީކްއެންޑް އާއި އެމެރިކާގެ ލަވަކިޔުންތެރިޔާ އަދި އެކްޓްރެސް، ސެލީނާ ގޮމޭޒްގެ ވާހަކައެވެ.

އަހަރުގެ ކުރީ ކޮޅު ދެ މީހުންގެ ގުޅުން އެމީހުން ހާމަ ކުރިއެވެ. އަދި އެކުގައި ދުނިޔޭގެ އެކި ކަންކޮޅަށް ދަތުރު ކުރުމަށް ފަހު، 10 މަސް ފަހުން 2017 ވަނަ އަހަރުގެ އޮކްޓޯބަރު މަހު ދެ މީހުން ވަކިވިއެވެ. އަދި ސެލީނާ، އޭނާގެ ކުރީގެ ލޯބިވެރިޔާ ޖަސްޓިން ބީބަރއާ އެކު އަނެއްކާ ވެސް ފެންނަން ފެށިއެވެ. ނަމަވެސް މާ ގިނަ ދުވަހަކު ނޫނެވެ. ސެލީނާ އާއި ޖަސްޓިން މިހާރު އަނެއްކާ ވެސް ވަކިވެފައިވާ ކަމަށް ގަބޫލު ކުރެވޭއިރު، ދަ ވީކްއެންޑް މިދިޔަ ހަފްތާގައި ނެރުނު އަލްބަމްގެ ލަވަތަކަކީ އޭނާ އާއި ސެލީނާގެ ގުޅުމަށް ބިނާކޮށް ތައްޔާރުކޮށްފައިވާ ލަވަތަކެއް ކަމަށް ފޭނުން ގަބޫލު ކުރެއެވެ.

އެގޮތުން، "ކޯލް އައުޓް މައި ނޭމް"ގެ ލިރިކްސްއަށް ބަލާއިރު، ދަ ވީކްއެންޑް ބުނަނީ، ދެ މީހުން ދިމާވުމަށް ފަހު އެކަކު އަނެކަކަށް އެހީވެވުނު ކަމަށާއި ނަމަވެސް "ހިތް ދެވުމަކީ މަގޭ ކުށެއް" ކަމަށެވެ. އަދި ލޯބިވި މީހެއްގެ ފުރާނަ ސަލާމަތް ކުރުމަށްޓަކައި "އަމިއްލަ މީހާގެ ހަށިގަނޑުގެ ބައެއް ކަނޑާލަން" ތައްޔާރަށް ހުރި ކަމަށް ވެސް މި ލަވައިގައި ކިޔައެވެ. (2017 ވަނަ އަހަރުގެ ސެލީނާ ވަނީ އޭނާ އާށް ކުރިމަތިވެފައިވާ ބަލީގައި، ކިޑްނީ ޓްރާންސްޕްލާންޓް ހަދާފައެވެ). ސެލީނާ އަށް ދަ ވީކެންޑްގެ ކިޑްނީ ހުށަހެޅި ކަމަށް މީޑިއާގައި ރިޕޯޓްކޮށްފައި ވެއެވެ. އަދި "އަހަރެންގެ ވަގުތު ހަމަ ބޭކާރު ކުރީ" ކަމަށް ދަ ވީކްއެންޑް ބުނެއެވެ.

"މައި ޑިއަރ މެލަންކޮލީ"ގެ އިތުރު ލަވައަކަށް ބަލާލާއިރު، "ވޭސްޓެޑް ޓައިމްސް"ގައި ބޮޑަށް ދައްކަނީ ކުރިން އެކީގައި އުޅުނު ލޯބިވެރިޔާ އާއި ފަހުން އެކުގައި އުޅުނު ލޯބިވެރިޔާ ގާތް ނުކުރާ ވާހަކައެވެ. ސެލީނާގެ ކުރިން ދަ ވީކްއެންޑް ރަށްޓެހިވެގެން އުޅުނީ މަޝްހޫރު މޮޑެލް ބެލާ ހަދީދުއާއެވެ.

"މެލަންކޮލީ"އަކީ ސަބަބެއް ނޭނގި ކުރެވޭ ހިތާމައެކެވެ.