މެންބަރުންނަކީ ރައްޔިތުންގެ އުންމީދުތައް ހަގީގަތަށް ހަދައިދޭން ޖެހޭ ބައެއް: ނަޝީދު
19 ޑިސެމްބަރު 2018 | ބުދަ 03:49ބޯހިޔާވެހިކަން ހޯދައިދިނުމަކީ ސިޔާސީ ލީޑަރުން ރައްޔިތުންނަށް ދާރާފައިވާ ބޮޑު ދަރަންޏެއް
މީކާއިލްގެ ކެމްޕެއިން އިފްތިތާހުކުރުމުގެ ހަފުލާގައި ކުރީގެ ރައީސް ނަޝީދު ވާހަކަ ދައްކަވަނީ
ގާނޫނު އަސާސީ ލިޔެފައި އޮތީ ރައްޔިތުންގެ ދިރިއުޅުން ރަނގަޅުކުރަން ކަމަށާއި މަޖިލީހުގެ މެންބަރުންނަކީ ރައްޔިތުންގެ އުންމީދުތައް ހަގީގަތަށް ހަދައިދުނަމަށް މަސަތްކަތް ކުރަންޖެހޭ ބައެއްކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ގަލޮޅު ދެކުނު ދާއިރާގެ އެމްޑީޕީގެ ޕްރައިމަރީގައި ވާދަކުރާ މީކާއިލް ނަސީމްގެ ކެމްޕެއިން އިފްތިތާހް ކުރުމަށް ބޭއްވި ހަފްލާގައި ނަޝީދު ވިދާޅުވީ ރައްޔިތުންގެ މަޖިލީހުގެ މެމްބަރުންނަކީ ރައްޔިތުންގެ ހައްގުގައި މެނުވީ އެއްވެސް ކަމެއް ކޮށްގެންވާނެ ބައެއް ނޫން ކަމަށެވެ. އަދި މިނިވަންކަމުގެ މާނަ ގުޅިފައި އޮތީ ތާހިރު ދިރިއުޅުމަކާއެކުގައި ކަމަށާއި ރާއްޖޭގެ ރައްޔިތުންނަށް ބޯހިޔާވެހިކަން ހޯދައިދިނުމަކީ ސިޔާސީ ލީޑަރުން ރައްޔިތުންނަށް ދާރާފައިވާ ބޮޑު ދަރަންޏެއް ކަމަށް އެ މަނިކުފާނު ވިދާޅުވި އެވެ. އަދި ރާއްޖޭގެ ރައްޔިތުންގެ ހައްގު މިންވަރު ހޯދައިދިނުމަކީ ސިޔާސީ ޕާޓީއެއްގެ އެންމެ ބޮޑު މަސްއޫލިއްޔަތުކަމަށް ވެސް އެމަނިކުފާނު ވިދާޅުވި އެވެ.
މަޖިލީހުގެ މެންބަރުންނަކީ ރައްޔިތުންގެ އުންމީދުތައް ހަގީގަތަށް ހަދައިދުނަމަށް މަސަތްކަތް ކުރަންޖެހޭ ބައެއްކަމަށާއި ރައްޔިތުންގެ ހައްގުގައި މެނުވީ އެއްވެސް ކަމެއް ކޮށްގެންވާނެ ބައެއް ނޫންކަމަށް ނަޝީދު ވިދާޅުވި އެވެ.
އެމްޑިޕީއަކީ ރައްޔިތުންގެ މަޖިލީހަށް ޕްރައިމަރީ ބާއްވާ ހަމައެކަނި ޕާޓީކަން ފާހަގަ ކުރައްވައި ނަޝީދު ވިދާޅުވީ، ޕްރައިމަރީ ކާމިޔާބުކުރާ ކެންޑިޑޭޓުގެ ފަހަތަށް ހުރިހާ ބޭފުޅުން އަރާނެކަމަށެވެ.
މި ހަފްލާގައި މީކާއިލް ނަސީމު ވިދާޅުވީ 23 ސެޕްޓެމްބަރުގައި އިންގިލާބީ ބަދަލެއް ގެނަވުނުކަމަށާއި އެ ބަދަލު ފުރިހަމަވާނީ ސަރުކާރު ހިންގާ ބާރާއި ފަނޑިޔާރު ގޭގެ އިތުރުން ރައްޔިތުންގެ މަޖިލީސް އިސްލާހުކުރެވިގެންކަމަށެވެ. މަހުޖަނެއްގެ ފައި ބުޑަށް ނުވެއްޓޭނެ ކަމަށާއި އިންތިޚާބަށް ވޯޓް ވެސް ނުގަންނާނެ ކަމަށް އޭނާ ވިދާޅުވެފައެވެ.
މަޖިލީހުގެ މެމްބަރަކަށް ހޮވިއްޖެ ނަމަ މަޖިލީހުގެ މެމްބަރުން ޒިންމާދާރުކުރެވުމަށާއި ބައެއް އުސޫލުތަކަށް ބަދަލުތައް ގެނައުމަށް މަސައަަކަތް ކުރައްވާނެ ކަމަށް މީކާއިލް ވިދާޅުވި އެވެ. އެގޮތުން މަގުބޫލު އުޒުރެއްނެތި މަޖިލީހަށް ހާޒިރު ނުވާނަމަ މެމްބަރުންގެ މުސާރައިން ކެނޑޭ ގޮތަށާއި، މެމްބަރުންގެ މުސާރަ ޕޭ ކޮމިޝަނުން ކަނޑައަޅާ ގޮތަށް އިސްލާހު ހުށަހަޅުއްވާނެ ކަމަށް ވިދާޅުވި އެވެ. ކޮންމެ މަހަކު މެމްބަރު، ދާއިރާގެ ރައްޔިތުންނާއި ބައްދަލުކުރަންޖެހޭ ގޮތަށް އިސްލާހު ހުށަހެޅުއްވާނެ ކަމަށާއި އަދި އިންތިޚާބުވާ ޕާޓީން ވަކި ނުވެވޭނެ ގޮތަށް އެންޓި ޑިފެކްޝަން ބިލް އަލުން ހުށަހެޅުއްވާނެ ކަމަށް ވެސް އޭނާ ވިދާޅުވި އެވެ.
މީކާއިލް ވިދާޅުވި ކެމްޕެއިންނަށް ހަރަދުކުރުމުގެ އުސޫލުތައް އިސްލާހުކުރަން މަސައްކަތް ކުރައްވާނެ ކަމަށެވެ. އަދި މިފަހަރު އޭނާގެ ކެމްޕެއިން އަށް ފައިސާ ހޯދާ ގޮތާއި މާލީ ބަޔާން އަންނަ ހަފުތާގައި އިއުލާނު ކުރާނެ ކަމަށް ވެސް ވިދާޅުވި އެވެ.
