ކަޅުވަކަރު މިސްކިތް ބަހައްޓާނެ ތަނެއް ކަނޑައަޅަން ބާއްވާ ފޯރަމް މާދަމާ ރޭ
ފޯރަމް ބާއްވަނީ ރަސްރަނި ބަގީޗާގައި
ކަޅުވަކަރު މިސްކިތް ހޯދާފައި
ކުރީގެ ރައީސް އަބްދުﷲ ޔާމީންގެ ސަރުކާރުން ރޫޅާލާފައިވާ ކަޅުވަކަރު މިސްކިތް އަލުން ބަހައްޓާނެ ތަނަކާ ގުޅޭ ގޮތުން އާންމުންނަށް ހުޅުވާލައިގެން ބާއްވާ ފޯރަމް ބުދަ ދުވަހުގެ ރޭ ބާއްވަން ނިންމައިފިއެވެ.
އާޓްސް، ކަލްޗަރ އެންޑް ހެރިޓޭޖު މިނިސްޓްރީން ބުނީ އެ ފޯރަމް އޮންނާނީ ބުދަ ދުވަހުގެ ރޭ 8:45ގައި ރަސްރަނި ބަގީޗާގައި ކަމަށެވެ.
ކަޅުވަކަރު މިސްކިތް ބަހައްޓާނެ ތަނަކާ ގުޅޭ ގޮތުން ސޯޝަލް މީޑިއާގައި އެކި މީހުން ދަނީ ހިޔާލުފާޅު ކުރަމުންނެވެ. އެގޮތުން ދިރާގުގެ ކުރީގެ ހެޑް އޮފީސް ހިންގި އިމާރާތް ހުރި ބިމާއި ހުކުރު މިސްކިތުގެ ބަގީޗާ ހުރި ސަރަހައްދާއި ސިނަމާލެ ބްރިޖު ހިމެނޭ ސަރަހައްދު މާލޭގެ އިރުމަތީފަރާތު ސަރަހައްދުގައި އެ މިސްކިތް އަލުން ރޭވުމަށް ރައްޔިތުން ދަނީ ޚިޔާލު ހުށަހަޅަމުންނެވެ.
ކަޅުވަކަރު މިސްކިތް ހޯދައި، އަލުން އެ މިސްކިތް ރޭވުމަކީ ރައީސް އިބްރާހިމް މުހައްމަދު ސޯލިހުގެ ސަރުކާރުގެ 100 ދުވަހުގެ ވައުދުގެ ތެރޭގައި ހިމެނޭ ކަމެކެވެ.
