ހުޅުމާލެ ސިފައިންގެ މަރުކަޒުގެ "މަސްޖިދުލް ޙާލިދު ބިން އަލް ވަލީދު" މިސްކިތް ހުކުރު ދުވަހު ހުޅުވައިފިއެވެ.

ހުޅުމާލެ ސިފައިންގެ މަރުކަޒުގައި ހުކުރު ދުވަހުގެ މެންދުރު ބޭއްވި ހާއްސަ ރަސްމިއްޔާތެއްގައި މި މިސްކިތް ހުޅަވައިދެއްވީ އިސްލާމިކް މިނިސްޓަރ ޑރ.އަހުމަދު ޒިޔާދު ބާގިރެވެ.

މިނިސްޓްރީ އޮފް އިސްލާމިކް އެފެއާޒް އިން ފަންޑުކުކޮށްގެން ބިނާކުރި މި މިސްކިތުގައި އެއްފަހަރާ 100 މީހުންނަށް ޖަމާޢަތުގައި ނަމާދު ކުރެވެއެވެ. މި މިސްކިތް އިމާރާތް ކޮށްފައިވަނީ ރާއްޖޭގެ ތާރީހީ މިސްކިތްތައް ނަކަލްކޮށްގެން ޗީފް އޮފް ޑިފެންސް ފޯސް މޭޖަރ ޖެނެރަލް އަޙުމަދު ޝިޔާމްގެ ކޮންސެޕްޓަކަށް އެމްއެންޑީއެފް މިލިޓަރީ އިންޖިނިއަރސްއިންނެވެ.

މި މިސްކިތުގެ ތަޅުން ވަށައިގެން 3 ފޫޓަށް އުސްކުރެވިފައި ވާއިރު މިސްކިތުގެ ފުރާޅުތައް ލެވިފައިވަނީ އިހުޒަމާނުގެ މިސްކިތްތައް ހުންނަ ގޮތަށް ތިރިކޮށެވެ. މި މިސްކިތުގެ އިމާރާތުގައި ވުޟޫކުރެވޭނެ އިސްކުރުބަރިއެއްގެ އިތުރުން ފާހާނާއަކާއި ގުދަނެއް ހިމެނެއެވެ.

"މަސްޖިދުލް ޙާލިދު ބިން އަލް ވަލީދު" މިސްކިތުގައި މިއަދުގެ ހުކުރު ނަމާދު އިމާމްވެ ކޮށްދެއްވީ މޭޖަރ ޢަބްދުލް މަޖީދް އިބްރާޙީމެވެ.