ރާއްޖެ އާއި އިންޑިއާ ދެމެދު އަސްކަރީ އެއްބަސްވުމެއްގައި ސޮއިކޮށްފައި ނުވާނެ ކަމަށް ހާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހު އިންޑިއާ އަށް މިހާރު ކުރައްވަމުން ގެންދަވާ ދަތުރުފުޅާ ބެހޭ ގޮތުން ނިއު ދިއްލީގައި ދިވެހި ނޫސްވެރިންނަށް މައުލޫމާތު ދެއްވަމުން ޝާހިދު ވިދާޅުވީ، އަސްކަރީ އެއްބަސްވުމާ ގުޅޭ ގޮތުން މަޝްވަރާ ވެސް ކޮށްފައި ނުވާނެ ކަމަށެވެ.
ނަމަވެސް ރާއްޖެ އާއި އިންޑިއާ ސިފައިންނާ ގުޅިގެން ތަމްރީނުތައް ކުރިއަށްގެންދާނެ ކަމަށް ޝާހިދު ވިދާޅުވިއެވެ.
ރައީސް އިންޑިއާ އަށް ކުރައްވާ ދަތުރުފުޅުގެ ސަބަބުން ރާއްޖެއާ ޗައިނާއާ ދެމެދު އޮންނަ ގުޅުމެއް ބުރޫއަރާފާނެތޯ ނޫސްވެރިޔަކު ސުވާލު ކުރުމުން ޝާހިދު ވިދާޅުވީ، ޗައިނާއަކީ ރާއްޖެއަށް ދީލަތި އެހީތަކެއް ވެދެމުން އަންނަ ގައުމެއް ކަމަށެވެ. އަދި ރާއްޖޭ އާއި ޗައިނާއާ ދެމެދު އޮންނާނީ އަބަދުވެސް ގާތް ގުޅުމެއް ކަމަށް ވިދާޅުވިއެވެ.
ޝާހިދު ވިދާޅުވީ، އިންޑިއާ އިން ރާއްޖެއަށް ދީފައިވާ ލޯނަކީ ރައީސް ޔާމިންގެ ސަރުކާރުން އަމަލު ކުރަމުން ދިޔަ ގޮތުން އައިސްފައި ހުރި ލޮޅުންތައް ހަމަޖެއްސުމަށްޓަކައި ދީލަތި ގޮތެއްގައި ދީފައިވާ ލޯނެއް ކަމަށެވެ.
"ރާއްޖޭގެ ބަޖެޓަށް މިދިޔަ ސަރުކާރުން އަމަލުކުރަމުންދިޔަ ގޮތުން އައިސްފައި ހުރި ލޮޅުންތައް ހަމަޖެއްސުމަށްޓަކައި، މިދިޔަ ސަރުކާރުގެ މާލީ އުސޫލުތައް ގޯސް ކަމުން ރާއްޖޭގެ ރައްޔިތުންނަށް ދިމާވެފައިވާ ގޮންޖެހުންތައް ހުރަސް ކުރުމަށްޓަކައި ބޭނުންވާ އެހީ ވަރަށް ދީލަތި ގޮތެއްގައި ހަމަޖެހިގެން ދިޔަ،" ޚާރިޖީ ވަޒީރު ވިދާޅުވިއެވެ.
މީގެ ކުރިން ވެސް ޚާރިޖީ ވަޒީރުކަން ކުރައްވާފައިވާ ޝާހިދު ވިދާޅުވީ އިންޑިއާ އިން ތައުލީމު ހާސިލްކުރަން 1000 ޝްކޯލާ ޝިޕް ވެސް މި ފަހަރުގެ ދަތުރުގައި ހަމަޖެހިގެން ދިޔަ ކަމަށެވެ.
ރައީސް އިންޑިއާ އަށް ކުރެއްވި ދަތުރުފުޅަކީ ބައިނަލްއަގްވާމީ މަސްރަހުގައި، ރާއްޖެއާ މެދު ގެއްލިފައިވާ އިތުބާރު ހޯދުމުގެ މަސައްކަތުގެ ފެށުމެއް ކަމަށް ޝާހިދު ވިދާޅުވިއެވެ. އެގޮތުން ރައީސް ސޯލިހު ދެން އެންމެ އަވަހަށް ދަތުރުފުޅެއް ކުރައްވަނީ އެކުވެރި އަރަބި އިމާރާތުގެ އަބޫދާބީ އަށެވެ. އެ ދަތުރުފުޅު ކުރައްވަނީ އަންނަ އަހަރުއެވެ.
