ޖޭއެސްސީގެ ނައިބުގެ ރައީސަކަށް މަސްތޫރު

ޖުޑީޝަލް ސާރވިސް ކޮމިޝަން (ޖޭއެސްސީ) ނައިބު ރައީސަކަށް މަސްތޫރު ޙުސްނީ ހަމަ ޖައްސައިފިއެވެ.

ޖޭއެސްސީއަށް ރައީސުލްޖުމްހޫރިއްޔާ އައްޔަންކުރައްވާފައިވާ މެމްބަރެއްގެ ގޮތުގައި އިންނަވާ މަސްތޫރު އެ ކޮމިޝަނުގެ ނައިބު ރައީސަކަށް ހޮވާފައިވަނީ މިދިޔަ ހޯމަ ދުވަހު ބޭއްވި ބައްދަލުވުމެއްގައެވެ. ޖޭއެސްސީގެ ނައިބު ރައީސްކަމަށް މަސްތޫރު ހޮވާފައިވަނީ ކޮމިޝަނުގެ އެ ބައްދަލުވުމުގައި ބައިވެރިވަޑައިގެންނެވި މެމްބަރުންގެ އިއްތިފާގުންނެވެ.

މަސްތޫރުގެ ކުރިން ޖޭއެސްސީގެ ނައިބު ރައީސްގެ މަގާމުގައި ހުންނެވީ ކުރީގެ ރައީސް އަބްދުﷲ ޔާމިންގެ ފަރާތުން އެ ކޮމިޝަނުގައި އިންނެވި އަހްމަދު ސަލީމެވެ. ނަމަވެސް ރައީސް އިބްރާހިމް މުހައްމަދު ސޯލިހް ވަނީ އެ މަގާމުން ސަލީމް ވަކި ކުރައްވައި މަސްތޫރު އައްޔަން ކުރައްވާފައެވެ.

މަސްތޫރުގެ އިތުރުން މިހާރު ޖޭއެސްސީގައި ތިއްބަވަނީ ޖޭއެސްސީގައި ރައްޔިތުންގެ މަޖިލީހުގެ ރައީސް ގާސިމް އިބްރާހިމްއާއި، ސްޕްރީމްކޯޓުގެ ފަނޑިޔާރު އަބުދުﷲ އަރީފާއި، ހައިކޯޓުން އިންތިހާބު ކޮށްފައިވާ ފަނޑިޔާރު އަބުދުއްރައޫފު އިބްރާހިމާއި، ދަށު ކޯޓުތަކުން އިންތިހާބުކޮށްފައިވާ ފަނޑިޔާރު މުހައްމަދު އީސާ ފުޅާއި، ރައްޔިތުންގެ މަޖިލީހުން ކަނޑައަޅުއްވާފައިވާ މެމްބަރު އަހުމަދު ފާރިސް މައުމޫނާއި، އާންމުންގެ ތެރެއިން މަޖިލީހުން ޖޭއެސްސީއަށް ކަނޑައަޅުއްވާފައިވާ މެމްބަރު އަބުދުލް ހަންނާން އަހުމަދާއި، ސިވިލް ސާވިސް ކޮމިޝަނުގެ ރައީސް ޑރ. އަލީ ޝަމީމް އާއި، ބަންޑާރަނައިބް އިބްރާހިމް ރިފްއަތާއި، ވަކީލުންގެ ތެރެއިން އިންތިހާބުކޮށްފައިވާ ލާތީފާ ގާސިމެވެ.