ފިލިޕީންސް އިން ވަގަށް ނަގާފައިވާ ތަރިކަތަކެއް އެމެރިކާ އިން ރައްދުކޮށްދީފި
އެމެރިކާއިން މި ރަނގަބީލުތައް ނަގާފައި ވަނީ 1901 ވަނަ އަހަރުގެ ތެރޭގައި
ރަނގަބީލުތައް ރައްދުކުރުމުން އުފާ ފާޅުކުރަނީ
މީގެ ގަރުނެއް ކުރިން، ފިލިޕީންސް އިން ވަގަށް ނަގާފައި ހުރި ކަމަށް އެ ގައުމުން ތުހުމަތުކުރާ ބަލަންގީގާ ރަނގަބީލުތައް، އެމެރިކާ އިން ރައްދު ކޮށްދީފިއެވެ.
މި ރަނގަބީލުތައް ނަގާފައި ވަނީ އެމެރިކާ-ފިލިޕީންސްގެ ހަނގުރާމައިގެ ދުވަސްވަރުގައެވެ. ފިލިޕީންސްގެ ރައީސް ޑުޓާޓޭ ވަނީ ރަނގަބީލުތައް އަނބުރާ ރައްދުކޮށް ދިނުމުން އެމެރިކާއަށް ޝުކުރު އަދާ ކުރައްވައިފައެވެ.
އެމެރިކާއިން މި ރަނގަބީލުތައް ނަގާފައި ވަނީ 1901 ވަނަ އަހަރުއެވެ. ބަލަންގީގާ އަވަށުގައި ހުރި ރަނގަބީލުތައް ނެގީ، ފިލިޕީންސްގެ ހަނގުރާމަވެރިންތަކެއް އެމެރިކާ އަސްކަރިއްޔާގެ 48 މީހުން މަރާލުމުން އެކަމުގެ ބަދަލު ހިފުމުގެ ގޮތުންނެވެ.
މި ހުރިހާ ދުވަހު އެމެރިކާއިން ވަނީ، އެއީ މަރުވި ސިފައިންގެ ހަނދާނުގައި ހުރި ތަރިކަތަކެއް ކަމަށް ބުނެ އެތަކެތި ރައްދު ކޮށްދިނުމުން އުޒުރުވެރިވެފައެވެ. ނަމަވެސް ރަނގަބީލުތައް އަނބުރާ ހޯދުމަށް ފިލިޕީންސް އިން ކެނޑިނޭޅި މަސައްކަތް ކުރުމުގެ ސަބަބުން އެމެރިކާއިން އެންމެ ފަހުން ރަނގަބީލުތައް ރައްދުކޮށް ދޭން ނިންމީއެވެ.
