ދައުލަތުގެ ފައިސާ އާއި މުދަލަށް ހިޔާނާތްތެރިވުމުގެ މައްސަލަތަކާއި ގޮތް ނޭނގޭ މަރުތައް ބެލުމާ ގުލޭ ބިލެއް ސަރުކާރުން ރައްޔިތުންގެ މަޖިލީހަށް ހޯމަ ދުވަހު ހުށަހެޅުމަށް އެޖެންޑާކޮށްފިއެވެ.
ސަރުކާރުން ރައްޔިތުންގެ މަޖިލީހަށް ހުށަހަޅާ ބިލަށް ދީފައިވާ ނަމަކީ ދައުލަތުގެ ފައިސާ އާއި މުދަލަށް ހިޔާނާތްތެރިވުމުގެ މައްސަލަތަކާއި، ގޮތް ނޭނގޭ މަރުގެ މައްސަލަތައް ބެލުމުގެ ބިލެވެ. ސަރުކާރުގެ ފަރާތުން އެ ބިލު މަޖިލީހަށް ހުށަހަޅުއްވަނީ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިންއެވެ.
މި ބިލަކީ ރައީސުލްޖުމްހޫރިއްޔާ އެކުލަވާލައްވާފައިވާ ކޮރަޕްޝަން އެންޑް އެސެޓް ރިކަވަރީ ކޮމިޝަނަށާއި މަރާލާފައިވާ އަދި ގެއްލުވާލާފައިވާ މީހުންގެ މައްސަލަތައް ތަހުޤީޤުކުރާ ކޮމިޝަނަށް ޤާނޫނީ ބާރުތައް ދިނުމަށް ހުށަހަޅާފައިވާ ބިލެކެވެ.
އެ މައްސަލައިގެ ފުރަތަމަ ކިޔުން އިއްވައި، ބަހުސް ކުރިއަށް ގެންދިއުމަށް ވެސް ހޯމަ ދުވަހުގެ ޖަލްސާއަށް ވަނީ އެޖެންޑާކޮށްފައެވެ.
ހޯމަ ދުވަހުގެ ޖަލްސާއަށް ކޮމަންވެލްތާ އަލުން ގުޅުން ގާއިމު ކުރުމަށް ރައީސް ސޯލިހުގެ ސަރުކާރުން ނިންމާފައިވާތީ އެ މައްސަލަ ހުށަހެޅުމަށް ވެސް އެޖެންޑާ ކޮށްފައިވެއެވެ. އޭގެ އިތުރުން ހޯމް މިނިސްޓަރު ޝެއިހް އިމްރާން އަބްދުﷲއަށް ރުހުން ހޯދުމަށް ރައީސް ސޯލިހު ހުށަހަޅުއްވާ މައްސަލަ ކޮމެޓީއަށް ފޮނުވުމަށް ވެސް އެޖެންޑާކޮށްފައިވެއެވެ.
އޭގެ އިތުރުން މާދަމާގެ ޖަލްސާގައި އިތުރު ވަގުތު އޮތްނަމަ، ތިން ބިލެއްގެ ބަހުސް ވެސް ކުރިއަށް ގެންދާނެއެވެ. އެއީ ބޭރުގެ ފާރާތްތަކަށް ބިން ވިއްކުން ހުއްޓުވުމަށް ގާނޫނުއަސާސީއަށް ހުށަހަޅާފައިވާ އިސްލާހާއި މަޖިލީހުގެ މެމްބަރުންގެ އަދަދު އިތުރު ނުކުރުމަށް ގާނޫނުއަސާސީއަށް ހުށަހަޅާފައިވާ އިސްލާހާއި އިމިގްރޭޝަނާ ބެހޭ ގާނޫނަށް އިސްލާހު ގެނައުމުގެ ބިލެވެ. އެ ތިން ބިލަކީ ވެސް ޕީޕީއެމުން މަޖިލީހަށް ހުށަހަޅާފައިވާ ބިލްތަކެވެ.
