ފިޝަރީޒު މިނިސްޓަރު ގެމަނަފުށީ މަސްވެރިންނާ ބައްދަލުކުރައްވައިފި
2 ޑިސެމްބަރު 2018 | އާދީއްތަ 15:44މަސްވެރިންގެ ހުރި ޝަކުވާތައް މިނިސްޓަރު ވަނީ އަޑުއައްސަވާފައި
މިނިސްޓަރު ޒަހާ ގެމަނަފުއްޓަށް ކުރެއްވި ދަތުރުފުޅު ތެރެއިން
މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ގެމަނަފުށީ މަސްވެރިންނާ ބައްދަލުކުރައްވައިފި އެވެ.
ގއ. އަތޮޅަށް ކުރައްވަމުން ގެންދަވާ ދަތުރުފުޅުގައި ހުކުރު ދުވަހު މިނިސްޓަރު ގެމަނަފުށީ މަސްވެރިންނާ އެކު ބޭއްވި ބައްދަލު ކުރެއްވުމުގައި، މަސްވެރިން ވަނީ ޝަކުވާތައް ބަންޑުންކޮށްލައިފަ އެވެ. މަސްވެރިންގެ އެންމެ ބޮޑު ޝަކުވާއަކަށްވީ އެ އަތޮޅުގައި ހުރި އައިސް ޕްލާންޓްތައް ހިންގުމަށް ނާގާބިލް މީހުން ތިބި މައްސަލަ އެވެ.
މިނިސްޓަރު ޒަހާ ވިދާޅުވީ މަސްވެރިންނަށް ފަސޭހަ ގޮތަކަށް އައިސް ލިބޭނެ އިންތިޒާމް ހަމަޖެއްސުމަކީ މި ސަރުކާރުގެ ވައުދެއް ކަމަށާއި އެކަން ތަންފީޒުކުރުމުގެ މަސައްކަތް ކުރައްވަމުން ގެންދަވާ ކަމަށެވެ. މިފްކޯ އަށް މަސްކިރުވައިގެން ފައިސާ ނުލިބޭތީ ވެސް މަސްވެރިން ތިބީ ހިތްހަމަ ނުޖެހިފަ އެވެ. އެކަމާ ގުޅޭ ގޮތުން މިނިސްޓަރު ވިދާޅުވީ މިފްކޯގެ ހިންގުން ހަރުދަނާވެ ކުންފުނި ހިންގަން ފެށުމާއި އެކު އެކަމަށް ހައްލެއް އަންނާނެ ކަމަށެވެ.
މިނިސްޓަރު ޒަހާ ގެމަނަފުއްޓަށް ވަޑައިގެން އެ ރަށު ކައުންސިލާ ވެސް ވަނީ ބައްދަލުކުރައްވައިފަ އެވެ.
