އިންޑިއާގެ ދަނޑުވެރިކަމުގެ ސިނާއަތުގައި މަސައްކަތް ކުރާ އެތައް ހާސް ދަނޑުވެރިންތަކެއް އެ ގައުމުގެ ވެރިރަށް ދިއްލީގައި މުޒާހަރަ ކުރަމުން އެބަދެއެވެ.

މުޒާހަރާގެ ބައިވެރިން ގޮވަމުން ދަނީ އެމީހުން އުފައްދާ ތަކެއްޗަށް މިހާރަށް ވުރެ ރަނގަޅު އަގުތަކެއް ހޯދައި ދިނުމަށާއި އެމީހުންގެ ބޮލުގައި އެޅިފައިވާ ދަރަނިތަށް ފިލުވާލަ ދިނުމަށެވެ.

މުޒާހަރާ އިންތިޒާމް ކުރާ ފަރާތްތަކުން ބުނެފައި ވަނީ ދެ ދުވަހުގެ މުއްދަތަށް ކުރިއަށް ގެންދާ މި ހަރަކާތް ނިމިގެން ދާނީ ދަނޑުވެރިންގެ ފަރާތުން އިންޑިއާގެ ބޮޑު ވަޒީރު ނަރެންދުރަ މޯޑީއަށް ހުށައަޅާ ޕެޓިޝަން ހުށައެޅުމަށް ފަހުގައި ކަމަށެވެ. މި ޕެޓިޝަން ހުށައަޅާފައި ވަނީ މައިގަނޑު ތިން ކަމެއް ކޮށްދިނުމަށް އެދިފައެވެ. އެއީ ދަނޑުވެރިންގެ އުފެއްދުންތަކަށް ރަނގަޅު އަގެއް ހޯދައި ދިނުމާއި، ދަރަނި މަޢާފް ކޮށްދިނުމާއި އަދި އެ ގައުމުގެ ގާނޫނު ހަދާ މަޖިލީހުން މި ކަންކަމުގެ މަޝްވަރާ ކުރުމަށް ޖަލްސާ އެއް ބާއްވައިދިނުމެވެ.

80000 ދަނޑުވެރިން ބައިވެރިވެފައިވާ މި މުޒާހަރާގެ ބައިވެރިން ވަނީ ބޮޑު ވަޒީރު މޯޑީގެ ސަރުކާރު ނިމުމަކަށް ގެންނަން ޖެހޭ ކަމަށް ވެސް ގޮވާލާފައެވެ. މޯޑީ ވަނީ ވެރިކަމަށް އައުމުގެ ކުރިން 2022 ވަނަ އަހަރުގެ ކުރިން ދަނޑުވެރިންގެ އާމްދަނީ ދެގުނަ އިތުރު ކުރާނެ ކަމަށް ބުނެ ވައުދުވެފައެވެ. ނަމަވެސް ދަނޑުވެރިން ބުނަމުންދަނީ މި ސަރުކާރުގައި އެ މީހުންގެ އާމްދަނީ ދިޔައީ ކުރިއަށް ވުރެން ދަށަށް ކަމަށެވެ.

ފާއިތުވެ ދިޔަ 20 އަހަރުގެ ތެރޭގައި އިންޑިއާގެ ތިން ލައްކަ ދަނޑުވެރިން ވަނީ އަމިއްލައަށް މަރުވެފައެވެ. މިކަމުގެ ސަބަބުތަކުގެ ތެރޭގައި ދަނޑު ހަލާކުވެގެން އުފެއްދުންތެރިކަން ދަށްވުމާއި، ދަނޑުތަކަށް ފެން ފޯރުކޮށްދިނުމުގައި ކުރިމަތިވާ އުނދަގޫ ތަކާއި އަދި ދަރަނި އަނބުރާ ނުދެއްކުން ފަދަ ކަންކަން ހިމެނެއެވެ.