މިނިވަން ވެފައިވަނީ ދިވެހި ރައްޔިތުންގެ ސާބިތުކަމާއި ނުގުޑާފަދަ އަޒުމުގެ ސަބަބުން: ރައީސް ނަޝީދު
26 ނޮވެމްބަރު 2018 | ހޯމަ 12:10ދިވެހިރާއްޖޭގެ ޝަރުއީ ނިޒާމަކީ އިންސާފުވެރިކަމާއި އެކީ ހިގާނެ ޝަރުއީ ނިޒާމަކަށް ވެގެން ދިއުމަށް އުއްމީދުކުރައްވާ
ރައީސް މުހައްމަދު ނަޝީދު
ރައީސް ނަޝީދު މިނިވަންވެފައިވަނީ ދިވެހި ރައްޔިތުންގެ ސާބިތުކަމާއި ނުގުޑާފަދަ އަޒުމުގެ ސަބަބުން ކަމަށް ރައީސް ނަޝީދު ވިދާޅުވެއްޖެއެވެ. ރައީސް ނަޝީދު މިނިވަންވެ ވަޑައިގަތުމަށްފަހު ސުޕްރީމް ކޯޓް ބޭރުގައި ހުންނަވާ މީޑިއާތަކާއި ބައްދަލުކުރައްވާ ދެއްކެވި ވާހަކަފުޅުގައި އެ މަނިކުފާނު ވިދާޅުވީ ނިމިދިޔަ ރިޔާސީ އިންތިހާބުގެ ނަތީޖާ އައި ގޮތުން ޕްރޮސިކިއުޓަރ ޖެނެރަލްއަށް އެ މަނިކުފާނުގެ މައްސަލައަކީ އިންތިހާއަށް ގައުމުގެ މަސްލަހަތާއި ގުޅިފައި އޮތް މައްސަލައެއްކަން އެނގިވަޑައިގެންނެވި ކަމަށެވެ. ޕްރޮސިކިއުޓަރ ޖެނެރަލް އަލުން އެ މައްސަލަ މުރާޖައާކުރުމަށް އެދިވަޑައިގެންނެވީ އެ ސަބަބާއި ހުރެ ކަމަށް ރައީސް ނަޝީދު ވިދާޅުވިއެވެ.
"މުރާޖައާކުރުމާއި ގުޅިގެން ދެންމެ އަޅުގަނޑުމެންނަށް އަޑު އިވުނު ހުކުމް އަޅުގަނޑުމެންނަށް އެ ލިބުނީ. އަޅުގަނޑު ދެކޭ ގޮތުގައި ހަގީގަތުގައި މި ގޮތަށް މި އަތަށް ނިމިގެން އެބުރިގެން ދިއުމުގެ އެންމެ ބޮޑު ސިއްރަކީވެސް އެންމެ ބޮޑު ސަބަބަކީވެސް ދިވެހިރާއްޖޭގެ ރައްޔިތުން،" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެ މަނިކުފާނު އުއްމީދުކުރައްވަނީ ދިވެހިރާއްޖޭގެ ޝަރުއީ ނިޒާމަކީ އިންސާފުވެރިކަމާއި އެކީ ހިނގާނެ ޝަރުއީ ނިޒާމަކަށް ވެގެން ދިއުން ކަމަށާއި، އަދި ރާއްޖޭގެ ޝަރުއީ ނިޒާމް އިންސާފުވެރި ކުރެވޭނެކަމަށް ދެކިވަޑައިގަންނަވާ ކަމަށެވެ. އަދި އެކަމަށް ބޭނުންވާ އިސްލާހުތަކާއި އެކަމަށް ބޭނުންވާ ގާނޫނު ތަކާއި، ގާނޫނުތަކަށް ގެންނަން ޖެހޭ ބަދަލުތަށް އަދި ގާނޫނު އަސާސީއަށް ގެންނަންޖެހޭ ބަދަލު ގެނެވޭނެ ކަމަށް ރައީސް ނަޝީދު ވިދާޅުވިއެވެ.
"ރައީސް އިބްރާހިމް މުހައްމަދު ސޯލިހު ހުވާކުރެއްވި ދުވަހުވެސް އަދި ހާއްސަކޮށް އެ ބޭފުޅާގެ ކެމްޕޭންގައި ތަކުރާރުކޮށް ވިދާޅުވަމުން ގެންދެވި އިންސާފު ގާއިމްކުރުމަކީ އެ ބޭފުޅާގެ ސަރުކާރުގައި އެ ބޭފުޅާގެ ވެރިކަމުގައި އެ ބޭފުޅާ ދެ ގޮތެއް ނުވެ ސާބިތުކަމާއިއެކު ކުރައްވަމުން ގެންދަވާނެ މަސައްކަތެއް،" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އެ މަނިކުފާނުގެ ވެރިކަން 2012 ވަނަ އަހަރު ނިމިގެން ދިޔައިރު އެމްޑީޕީ އޮތީ އިންސާފުގެ ދަތުރެއްގައި ކަމަށާއި، އޭރުވެސް ބޭނުންވެ ތިބީ ރާއްޖޭގެ ޝަރުއީ ނިޒާމާއި، ކޯޓުތަށް އިސްލާހުކުރުމުގެ މަސައްކަތް ކަމަށެވެ.
ރައީސް ނަޝީދަށް ކުރެވުނު 13 އަހަރުގެ ޖަލު ހުކުމުން އެ މަނިކުފާނު މިނިވަންވެވަޑައިގެންފައިވަނީ ހޯމަދުވަހުއެވެ.
