ޢާއްމު ރައްޔިތެއްގެ ކަންބޮޑުވުމާއެކު މަހްލޫފްގެ ކާރު ޕާރކް ކުރާތަން ބަދަލު ކުރަނީ
26 ނޮވެމްބަރު 2018 | ހޯމަ 05:26ބަދަލު ކުރަން އެދިވަޑައި ގަންނަވާނެ ކަމަށް މަހްލޫފް ވިދާޅުވި
މަހްލޫފްގެ ކާރ ޕާރކް ކުރުމަށް ކަނޑައަޅާފައިވާ ސަރަހައްދު
ހައުސިން މިނިސްޓްރީން، މިނިސްޓަރު އަހްމަދު މަހްލޫފުގެ ކާރުކޮޅު ޕާކު ކުރެއްވުމަށް ކަނޑައެޅި ތަނުގެ ޝަކުވާ މީހަކު ކުރުމުން އެތަން ބަދަލުކުރުމަށް އެދިވަޑައިގަތުމަށް މަހްލޫފު ނިންމަވައިފިއެވެ.
މަހްލޫފް މިގޮތަށް ނިންމެވީ އެމަނިކުފާނުގެ ކާރުކޮޅު ޕާރކް ކުރުމަށް ހައުސިންގ މިނިސްޓްރީން ކަނޑައަޅާފައިވާ ސަރަހައްދާއި ގުޅިގެން އާއްމު ރައްޔިތަކު ކަންބޮޑުވުން ފާޅު ކޮށްފައި ވަނިކޮށެވެ.
ރަޒާން ކިޔާ މީހަކު، މަހްލޫފްގެ ކާރު ޕާރކް ކުރުމަށް ކަނޑައަޅާފައިވާ ސަރަހައްދުގެ ފޮޓޯއަކާއެކު މަހްލޫފަށް ޓެގްކޮށް ކޮށްފައިވާ ޓްވީޓެއްގައި ބުނެފައިވަނީ މިއީ ވަރަށް ގޯސް ކަމެއް ކަމަށާއި މިސަރަހައްދުގައި ޕާކް ކުރުމަކީ ވަރަށް ބޮޑު ގޯހެއް ކަމަށެވެ. އަދި މަހްލޫފްވެސް އަމިއްލަ އެޕާޓްމަންޓް ދޮރުމަތީގައި ކާރު ޕާކް ކޮށްފައި ބާއްވަން ބޭނުންވާނެތޯ ވަނީ ސުވާލު އުފައްދާފައެވެ.
އެޓްވީޓާ ގުޅިގެން ސްޕޯޓްސް މިނިސްޓަރު އާދީއްތަ ދުވަހުގެރޭ ކުރެއްވި ޓްވީޓެއްގައި ވިދާޅުވީ ކާރު ޕާކުކުރަން ހައުސިން މިނިސްޓްރީން ދިން އޭރިޔާ އެހެން ތަނަކަށް ބަދަލުކޮށްދިނުމަށް ރަސްމީކޮށް ހައުސިން މިނިސްޓްރީގައި އެދިވަޑައިގަންނަވާނެ ކަމަށެވެ. އަދި އެތަން އާއްމުންނަށް ދޫކޮށްލުމަށްވެސް އެދިވަޑައިގަންނަވާނެ ކަމަށެވެ.
މީގެ އިތުރުން މަހްލޫފް ވަނީ އެރައްޔިތު މީހާގެ ކަންބޮޑުވުން މަހްލޫފްގެ ސަމާލު ކަމަށް ގެނައީތީ ޝުކުރުވެސް އަދާކުރައްވާފައެވެ.
މިނިސްޓަރު މަހްލޫފުގެ ކާރުކޮޅު ޕާކު ކުރުމަށް ހައުސިން މިނިސްޓްރީން ކަނޑައަޅާފައި ވަނީ މަހްލޫފު ދިރިއުޅުއްވާ ގޭގެ ދޮރުމައްޗަށްވާ ކަހަލަ ގޮތަކަށް ހުންނަ ޖިލްބާބު ފިހާރަ ދޮރުމަތީގައެވެ. މިތަން މަހްލޫފަށް ހާއްސަކޮށް ކުރަހައި ފުލުހުންގެ ކޯން ބަހައްޓާފައި ވަނީ އާދީއްތަ ދުވަހުގެރޭ އިރުއޮއްސުނު އިރުއެވެ.
