ކަރާޗީގައި ހުންނަ ޗައިނާގެ ކޮންސުލެޓްއަށް ހަމަލާދީފި
23 ނޮވެމްބަރު 2018 | ހުކުރު 13:10ހަމަލާގެ ޒިންމާ ނެގީ "ބަލޯޗް ލިބަރޭޝަން އާމީ" އިން
ހަމަލާދިން ކޮންސުލެޓް ކައިރީގަ ޕާކިސްތާނުގެ ސިފައިން ހަރަކާތްތެރިވަނީ
ޕާކިސްތާނުގެ ކަރާޗީގައި ހުންނަ ޗައިނާގެ ކޮންސުލެޓްއަށް ހަމަލާދީ ފުލުހުންގެ ދެ މީހަކު މަރާލައިފިއެވެ.
"ބަލޯޗް ލިބަރޭޝަން އާމީ" ގެ ނަން ދެވިފައިވާ ޖަމިއްޔާއަކުން ވަނީ މި ހަމަލާގެ ޒިންމަ ނަގާފައެވެ. މި ހަމަލާގައި ބައިވެރިވި އެ ޖަމާއަތުގެ ތިން މީހުން ވެސް މަރާލާފައިވާ ކަމަށް ޕާކިސްތާނު ސިފައިން ވަނީ ބުނެފައެވެ.
ކޮންސުލެޓްގައި މަސައްކަތް ކުރާ ހުރިހާ ޗައިނާ ރައްޔިތުން ވެސް ތިބީ ސަލާމަތުން ކަމަށް، މި ހާދިސާއާއި ބެހޭ މައުލޫމާތު ހާމަކުރުމަށް ބޭއްވި ނޫސްވެރިންގެ ބައްދަލުވުމެއްގައި، ޕާކިސްތާނުގެ ފޮރިން މިނިސްޓަރު ޝާހް މެހްމޫދް ޣުރެއިޝީ ވަނީ ވަދާޅުވެފައެވެ.
ޕާކިސްތާނުގެ ބޮޑު ވަޒީރު، އިމްރާން ޙާން ވިދާޅުވީ މިއީ ޗައިނާއާއި ޕާކިސްތާނާއި ގުޅިގެން ކުރިއަށް ގެންދާ މަސައްކަތްތަކަށް ބުރޫއެރުވުމަށް ހިންގި އަމަލެއްގެ ގޮތުގައި ސިފަކޮށްފައެވެ. އަދި ފުރިހަމަ ތަހުގީގެއް ހިންގުމަށް ކަމާބެހޭ ފަރާތްތަކުގެ މައްޗަށް އަމުރުކޮށްފައިވާ ކަމަށް ވެސް އެބޭފުޅާ ވަނީ ހާމަކުރައްވާފައެވެ.
ޗައިނާގެ ފޮރިން މިނިސްޓްރީގެ ތަރުޖަމާނު ވިދާޅުވީ ޗައިނާއިން މި ހަމަލާ ކުށްވެރި ކުރާ ކަމަށާއި އެ ގައުމުގެ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުރެވެން ހުރި ހުރިހާ މަސައްކަތެއް ކުރުމަށް ޕާކިސްތާނަށް ގޮވާލާކަމަށެވެ.
"ބަލޯޗް ލިބަރޭޝަން އާމީ" އަކީ ޕާކިސްތާނުގައި ހަރަކާތްތެރި ވަމުން އަންނަ ހަނގުރާމަވެރި ޖަމިއްޔާއެކެވެ. އެ މީހުން މަސައްކަތް ކުރަމުން ދަނީ ޕާކިސްތާނުގެ ބަލޮޗިސްތާނު ޕްރޮވިންސް ވަކި ދައުލަތަކަށް ހެދުމަށެވެ. މިއީ ޗައިނާއިން އެ ސައަހައްދުގައި ކުރިއަށް ގެންދާ މަޝްހޫރުތަކައި ދެކޮޅު ހެދުމުގެ ގޮތުން ކުރިޔަށް ގެންދާ ހަމަލާތަކެއް ކަމަށް އެ ޖަމިއްޔާއިން ވަނީ ބުނެފައެވެ.
