ބޭންކް އޮފް މޯލްޑިވްސްގެ ގއ. ވިލިނގިލި ބްރާންޗުން ވައްކަން ކުރި މައްސަލާގައި އިތުރު ހަ މީހުން ހައްޔަރުކޮށް، އެމީހުންނަށް ބަންދުގެ މުއްދަތު ޖަހައިފިއެވެ.

ފުލުހުންގެ މީޑިއާ އޮފިޝަލް ވިދާޅުވީ އޮކްޓޯބަރު 19 ވަނަ ދުވަހު ކޯޓު އަމުރެއްގެ ދަށުން ހައްޔަރުކުރި 4 މީހުންގެ ތެރޭގައި ބަންގްލަދޭޝް މީހަކު ހިމެނޭ ކަމަށާއި ފުލުހުންނަށް ލިބުނު މައުލޫމާތަކާއި ގުޅިގެން ފަޅު ގޯއްޗެއް ބަލާ ފާސްކުރުމުގެ ތެރެއިން އެ މައްސަލައާ ގުޅުން ހުރި ކަމަށް ބެލެވޭ ގޭސް ކަޓަރއެއް ވެސް ފެނިފައިވާ ކަމަށެވެ. އަދި އެ ހަތަރު މީހުންގެ ބަންދުގެ މުއްދަތަށް 10 ދުވަސް ޖަހާފައިވާ ކަމަށް މީޑިއާ އޮފިޝަލް ވިދާޅުވިއެވެ.

މީގެ އިތުރުން މި މައްސަލައާ ގުޅިގެން އިތުރު ދެ މީހަކު އޮކްޓޯބަރު 20 ވަނަ ދުވަހުގެ ރޭ ހައްޔަރުކޮށްފައިވާ ކަމަށާއި އެ ދެމީހުންގެ ބަންދުގެ މުއްދަތަށް 7 ދުވަސް ޖަހާފައިވާ ކަމަށް ފުލުހުން ބުންޏެވެ.

މީގެ ކުރިން އެ މައްސަލައާ ގުޅިގެން ފުލުހުން ވަނީ ޖުމްލަ 7 މީހަކު ހައްޔަރުކޮށްފައެވެ. އޭގެ ތެރެއިން 5 މީހެއްގެ ބަންދުގެ މުއްދަތަށް 15 ދުވަސް ޖަހާފައިވާއިރު އަނެއް ދެ މީހުންނަށް ގއ. ވިލިނގިލީ މެޖިސްޓްރޭޓް ކޯޓުން ވަނީ 7 ދުވަސް ބަންދުގެ މުއްދަތަށް ޖަހާފައެވެ.

މި މައްސަލައާ ގުޅިގެން މިހާރު ޖުމްލަ 13 މީހުން ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

ފުލުހުން ބުނީ ބީއެމްއެލްގެ ވިލިނގިލި ބްރާންޗުން ވައްކަން ކޮށްފައިވަނީ ފުރާޅު ހަލާކު ކޮށްލައިގެން އެތަނަށް ވަދެގެން ކަމަށެވެ. އަދި  އެ ބްރާންޗުން ގިނަ އަދަދެއްގެ ފައިސާ ވަގަށް ނަގާފައިވާ ކަމަށް ވެސް ފުލުހުން ބުންޏެވެ.

މީގެ އިތުރުން ވަގަށް ނެގި ގިނަ އަދަދެއްގެ ފައިސާ ހޯދާފައިވާ ކަމަށް ވެސް ފުލުހުންގެ މީޑިއާ އޮފިޝަލް ވަނީ ވިދާޅުވެފައެވެ. އެހެންނަމަވެސް ހޯދި ފައިސާގެ އަދަދު ފުލުހުން ހާމައެއް ނުކުރެއެވެ.