މަހްލޫފްގެ މައްޗަށް ހުކުމް ކުރުން މާދަމާ
20 ނޮވެމްބަރު 2018 | އަންގާރަ 18:16މަހްލޫފްގެ މައްޗަށް ދައުވާ ކުރަނީ ޓުވީޓަކާ ގުޅިގެން
ޔޫތް އެންޑް ސްޕޯޓްސް މިނިސްޓަރު އަހުމަދު މަހްލޫފް
ހިނގާފައިނުވާ ކަމެއް ހިނގައިފި ކަމުގެ މައުލޫމާތު ގާނޫނު ތަންފީޒުކުރާ އިދާރާއަކަށް ދިން ކަމަށް ބުނެ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ ކުރީގެ މެމްބަރު އަދި މިހާރު ޔޫތް އެންޑް ސްޕޯޓްސް މިނިސްޓަރު އަހުމަދު މަހްލޫފުގެ މައްޗަށް އުފުލާފައިވާ ދައުވާގެ ހުކުމް ކުރުމަށް ބުދަ ދުވަހު ކްރިމިނަލް ކޯޓުގައި ތާވަލް ކޮށްފި އެވެ.
އެއަޑުއެހުން ކްރިމިނަލް ކޯޓުގައި ތާވަލް ކޮށްފައިވަނީ ބުދަ ދުވަހުގެ 11:00 އަށެވެ.
މިނިސްޓަރު މަހްލޫފުގެ މައްޗަށް ކޮށްފައިވާ މި ދައުވާއާ ގުޅިގެން އޭނާ ދިފާއީ ވަކީލެއްގެ ގޮތުން އައްޔަން ކުރެއްވި ނާޒިމް އަބްދުއްސައްތާރު އެ މައްސަލައިގައި ކޯޓަށް ވަޑައިނުގެންނެވޭނެ ކަމަށް ކޯޓުން ވަނީ ނިންމާފަ އެވެ. އެއަށްފަހު މަހްލޫފު މި މައްސަލައިގައި ކޯޓަށް ވަޑައިގަންނަވަނީ ދިފާއީ ވަކީލަކު ނެތި އެވެ.
މިދިޔަ ޖެނުއަރީ މަހުގެ 20 ވަނަ ދުވަހުގެ ރޭ ކުރެއްވި ޓުވީޓަކާ ގުޅިގެން މަހްލޫފުގެ މައްޗަށް ކޮށްފައިވާ އެ ދައުވާއާ ގުޅިގެން މިދިއަ ޖޫން މަހުގެ ތިންވަނަ ދުވަހު ބޭއްވި އަޑުއެހުމުގައި މަހްލޫފު ވަނީ އޭނާގެ މައްޗަށް ކޮށްފައިވާ ދައުވާގައި ހުރި ގާނޫނީ މައްސަލަތަކެއް ފާހަގަކުރައްވާފަ އެވެ. އެގޮތުން އެ އަޑުއެހުމުގައި މަހްލޫފުގެ މައްޗަށް ކުށް ސާބިތު ކުރުމަށް ދައުލަތުން ހެކީގެ ގޮތުގައި ހުށަހަޅާފައިވާ ކަރެކްޝަނަލް ސަރވިސްގެ ސިޓީއަކާ ގުޅޭ ގޮތުން މަހްލޫފު ވިދާޅުވީ އެ ސިޓީގައި އޭނާ އެއްވެސް މައުލޫމާތެއް އެ މުއައްސަސާއަށް ނުދޭ ކަމަށް ފާހަގަކޮށްފައިވާ ކަމަށެވެ.
އެހެން ކަމުން ކަރެކްޝަނަލް ސަރވިސްއަކީ ގާނޫނު ތަންފީޒުކުރާ މުއައްސަސާއެއް ކަމަށް ދައުލަތުން މާނަ ކުރާ ގޮތަށް ބެލި ނަމަވެސް މަހްލޫފުގެ ޓުވީޓްގައި ހުރި މައުލޫމާތުތައް އެ މުއައްސަސާއަށް ވެސް އަދި އެ މުއައްސަސާގެ އިސް މީހަކަށް ދީފައިނުވާކަން އެ ސިޓީއިން އެނގޭއިރު އެތަނަށް މައުލޫމާތު ދިން ކަމަށް ބަލައި އެ ދައުވާ ނުކުރެވޭނެ ކަމަށް މަހްލޫފު ވިދާޅުވި އެވެ. ކަރެކްޝަނުން ފުލުހުނަށް ފޮނުވާފައިވާ އެ ސިޓީއަކީ މަހްލޫފު ކޮށްފައިވާ ޓުވީޓްއާއި ގުޅިގެން ދެކޭ ގޮތް ބެލުމަށް ފޮނުވި ސިޓީއެއްގެ ޖަވާބެކެވެ.
ހަމައެހެންމެ ހިނގާފައިނުވާ ކަމެއް ހިނގި ކަމުގެ މައުލޫމާތު މަހްލޫފު ދިން ގާނޫނު ތަންފީޒުކުރާ އިދާރާއަކީ ކަރެކްޝަނަލް ސަރވިސް ކަމަށް ދައުލަތުން ބުނުމުން މަހްލޫފު ވިދާޅުވީ ޖިނާއީ އިޖްރާއަތުގެ 18 ވަނަ މާއްދާގައި ގާނޫނު ތަންފީޒުކުރާ އިދާރާތައް ކަމަށް ބުނެފައިވަނީ ފުލުހުން ނުވަތަ ޖިނާއީ ކުށްކުށް ތަހްގީގު ކުރުމުގެ ބާރު ގާނޫނު އަސާސީ އާއި ގާނޫނުން ލިބިފައިވާ ފަރާތްތައް ކަމަށް ބުނެފައިވާ ކަމަށެވެ.
ނަމަވެސް ދައުލަތުގެ ވަކީލު ވިދާޅުވީ ޖިނާއީ އިޖްރާއަތުގެ ގާނޫނުގައި އެހެން އޮތަސް ކަރެކްޝަންސްއަކީ ޖަލު ހުކުމް ތަންފީޒް ކުރާ މީހުންގެ ހުރިހާ ކަންކަން ހަމަޖައްސައިދޭ ފަރާތްކަމަށްވާއިރު އެއީ ވެސް ގާނޫނު ތަންފީޒު ކުރާ މުއައްސާއެއް ކަމަށް ބަލަން ޖެހޭ ކަމަށެވެ.
މަހްލޫފު ކުރެއްވި ޓުވީޓަކީ ގާނޫނު ތަންފީޒު ކުރާ މުއައްސަސާއަކަށް މައުލޫމާތު ދިން ކަމަށް ބެލެވޭނެ ހަމައެއް ކަމަށް ދައުލަތުން ބުނުމުން އެ ވާހަކަތަކަށް ރައްދު ދެއްވައި މަހުލޫފް ވިދާޅުވީ އެއީ އޭނާ ދިން މައުލޫމާތެއް ނޫން ކަމަށާއި އެއީ އޭނާ ކަމާމެދު ދެކޭ ގޮތް ހާމަކުރުން ކަމަށެވެ. އަދި ފުލުހުންގެ އިދާރާއަށް މައުލޫމާތު ދެވޭނެ ގޮތް ފުލުހުންގެ އާންމު ގަވާއިދުގައި ބަޔާން ކޮށްފައިވާއިރު ޓުވީޓު ކުރުމަކީ ފުލުހުންނަށް މައުލޫމާތު ދެވޭނެ ގޮތެއް ކަމަށް ވެސް އެ ގަވައިދުގައި ބަޔާން ކޮށްފައިވާ ކަމަށެވެ. އެ ވާހަކަތައް އެގޮތަށް ވިދާޅުވުމުން ދައުލަތުގެ ވަކީލުން ވިދާޅުވީ މާނަކުރުމުގެ ގާނޫނުގައި ދިނުމަކީ އެއްޗެއް ރައްދުވުން ނުވަތަ ފޯރު ކޮށްދިނުން ކަމަށްވާއިރު ޓުވީޓަކީ ވެސް މައުލޫމާތު ދެވޭނެ ވަސީލަތެއް ކަމަށެވެ.
ޖަލުތަކުގައި ބޭސްފަރުވާ ނުދީ މީހުން މަރުވަމުންދާ ވާހަކަ ބުނެ މި ދައުވާ ސާބިތުވާ ކަމަށް ނިންމައި ހުކުމެއް ކޮށްފި ނަމަ އަބްދުﷲ ރަޝީދުގެ މަރުގެ މައްސަލައިގައި އެޗްއާރުސީއެމް އިން ބައެއްގެ މައްޗަށް ދައުވާ ކުރަން ފަހުން ނިންމައިފިނަމަ އެކަން އިޔާދަވާނެތޯ މަހްލޫފު ސުވާލު އުފެއްދެވި އެވެ. އެހެން ވިދާޅުވީ އެޗްއާރުސީއެމް އިން އެ މައްސަލަ ތަހްގީގުކޮށް ބައެއް މީހުންގެ މައްޗަށް ދައުވާ ކުރަން ޖެހޭތޯ ބަލަމުންދާ ކަމުގެ މައުލޫމާތު ލިބިފައިވާ ކަމަށްވެސް މަހްލޫފް ވިދާލުވެފައި ވެއެވެ.
