ސިޔާސީ ހައްޔަރީން މިނިވަންކުރުމާ ބެހޭ ކޮމިޓީ އުފައްދައިފި
ހޯމް މިނިސްޓަރާއި ޕޮލިސް ކޮމިޝަނަރު ވެސް ހިމެނޭ
މުޒާހަރާއެއްގެ ތެރެއިން މީހަކު ހައްޔަރު ކުރަނީ
ސިޔާސީ މަޤުޞަދެއްގައި ޖިނާއީ ތުހުމަތެއް ކޮށް، ހައްޔަރު ކޮށްފައިވާ މީހުން މިނިވަންކުރުމުގެ މަސައްކަތް ކުރިއަށް ގެންދެވުމުގެ ގޮތުން، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފަސް މެމްބަރުންގެ ކޮމެޓީ އެއް އުފައްދަވައިފިއެވެ.
ރައީސް އޮފީހުން ބުނީ އެ ކޮމެޓީގެ ނަމަކީ ސިޔާސީ ހައްޔަރީން މިނިވަންކުރުމާ ބެހޭ ކޮމިޓީ ކަމަށެވެ.
އެ ކޮމެޓީގައި ހިމެނިވަޑައިގަންނަވަނީ ހޯމް އެފެއާޒް މިނިސްޓަރު ޝެއިހް އިމްރާން އަބްދުﷲ އާއި ޕޮލިސް ކޮމިޝަނަރު ހަމްދޫން ރަޝީދާއި ރައީސުލްޖުމްހޫރިއްޔާގެ ލީގަލް ކައުންސެލް އަހުމަދު އަބްދުﷲ އަފީފާއި ބަންޑާރަ ނާއިބު އިބްރާހިމް ރިއްފަތެވެ. ރައީސް އޮފީހުން ބުނީ ރައީސް ސޯލިހުގެ ރިޔާސީ ވައުދުފުޅާ އެއްގޮތްވާ ގޮތުގެ މަތިން، އެމަނިކުފާނުގެ ރިޔާސީ ދައުރުގެ ފުރަތަމަ ދުވަހު އެ މަސައްކަތްޕުޅު ފެށްޓެވުމުގެ ގޮތުން، ސިޔާސީ ހައްޔަރީން މިނިވަންކުރުމާ ބެހޭ ކޮމިޓީ އުފައްދާފައި ވަނީ އާދީއްތަ ދުވަހުއެވެ.
