ރަގަޅު ސިއްހަތެއްގައި އެކުވެރިކަމާއެކު ކުރިއަށްދާން ބޭނުންވެފައި ތިބި ރައްޔިތުންތަކެއް ތިބިކަން ހާމަވެގެން ހިގައްޖެ: ރައީސް
18 ނޮވެމްބަރު 2018 | އާދީއްތަ 19:16ގިނަ ކުޅިވަރުތަކެއްގައި ރައީސް ސޯލިހުވަނީ އަމަލީގޮތުން ބައިވެރިވެވަޑައިގެންފައި
ރައީސް ސޯލިހު ޓޭބަލްޓެނިސް ކުޅުއްވަނީ
ރަގަޅު ސިއްހަތެއްގައި އެކުވެރިކަމާއެކު ކުރިއަށްދާން ބޭނުންވެފައި ތިބި ރައްޔިތުންތަކެއް ތިބިކަން ހާމަވެގެން ހިގައްޖެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މަގާމްގެ ހުވާކުރެއްވުމާއި ގުޅިގެން ކުރިއަށް ގެންދާ އުފާފާޅުކުރުންތަކުގެ ތެރޭގައި ހިމެނޭ "ދުޅަހެޔޮ ހަށިހެޔޮ އީދު" ސްޕޯޓްސް ފެސްޓިވަލް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ މިއަދު އެ މަނިކުފާނަށް ފެނިގެންދިޔައީ ރަގަޅު ސިއްހަތެއްގައި އެކުވެރިކަމާއެކު ކުރިއަށްދާން ބޭނުންވެފައި ތިބި ރައްޔިތުންތަކެއް ތިބި މަންޒަރު ކަމަށެވެ.
"އިތުރު އިވެންޓްތަށް ބާއްވާނަން. އެތައް ބައެއްގެ މަސައްކަތުން ބޭއްވުނު އިވެންޓެއް މިއީ. އިވެންޓް އިންތިޒާމްކުރި ފަރާތްތަކަށް ޝުކުރު އަދާކުރާނަން" ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ އެ މަނިކުފާނުގެ ރައީސުލްޖުމްހޫރިއްޔާކަމުގެ ހުވާކުރެއްވުމާއި ގުޅިގެން ބާއްވާ އުފާފާޅުކުރުންތަކުގައި ގިނަ ރައްޔިތުންތަކެއް ބައިވެރިވެވަޑައިގެންދެއްވުމަކީ އެކުވެރިކަމާއެކު ކުރިއަށް ދިއުމަށް ލިބޭނެ ހިތްވަރެއް ކަމަށެވެ.
ރައީސް ސޯލިހު ވިދާޅުވީ މި ފަދަ ސްޕޯޓްސް ފެސްޓިވަލްތަށް ކުރިއަށް އޮތް ތާގައިވެސް ބާއްވާނެ ކަމަށާއި މި ފެސްޓިވަލްގައި ބައިވެރިވެވަޑައިގެންނެވި ހުރިހާ ރައްޔިތުންނައް އެ ޝުކުރު އަދާ ކުރައްވާނެ ކަމަށެވެ.
ސްޕޯޓްސް ފެސްޓިވަލްގެ ގިނަ ކުޅިވަރުތަކެއް ކުޅުއްވުމުގައި ރައީސް ސޯލިހުވަނީ އަމަލީ ގޮތުން ބައިވެރިވެވަޑައިގެންފައެވެ. އެގޮތުން ބީޗްވޮލީ، ކިކްބޮކްސިން، ކެރަމް، ރާޒުވާ، ބަށި، ފަދަ ކުޅިވަރުތަށް ކުޅުއްވުމުގައި ރައީސް ސޯލިހުވަނީ އަމަލީ ގޮތުން ބައިވެރިވެވަޑައިގެންފައެވެ.
ރައީސް ސޯލިހު މަގާމުގެ ހުވާކުރެއްވުމާއި ގުޅިގެން ބާއްވާ އުފާ ފާޅުކުރުމުގެ ގޮތުން އާދީއްތަދުވަހުގެ ރޭ ބާއްވާ ޖާފަތުގައި، ހުރިހާ ރައްޔިތުން ބައިވެރިވަޑައިގެން ދެއްވުމަށް ރައީސް ސޯލިހުވަނީ އެދިވަޑައިގެންފައެވެ.
މި ޖާފަތް އޮތީ އާދީއްތަދުވަހުގެ ރޭ ބޮޑުތަކުރުފާނު މަގު އާރޓިފިޝަލް ބީޗްގައި ރޭގަނޑު 8.30 ގައެވެ.
އުފާފާޅުކުރުންތަކުގެ ތެރޭގައި ހިމެނޭ ކަންތަކުގެ ތެރެއިން ހޯމަދުވަހުގެ ރޭ ގަލޮޅު ބޯޅަދަނޑުގައި ބާއްވާ ފުޓްބޯޅަ މެޗްގައި ހުރިހާ ރައްޔިތުން ބައިވެރިވެވަޑައިގެން ދެއްވުމަށް ރައީސް ސޯލިހުވަނީ އެދި ވަޑައިގެންފައެވެ.
