ރާއްޖެޓީވީގެ ބޭނުމަކީ ހިޔާލުތަފާތު ކުރުމާއި ނަފްރަތު އުދެއްދުން ކަމަށް ކުރީގެ ރައީސް މުހައްމަދު ނަޝީދު ތުހުމަތު ކުރައްވައިފިއެވެ.
ރާއްޖެޓީވީގެ ބޭނުމަކީ ނަފްރަތު އުފެއްދުން ކަމަށް ވިދާޅުވެ، ރާއްޖޭގެ އެންމެ ގިނަ ބަޔަކު ބަލާ ޓީވީ ސްޓޭޝަނަށް ރައީސް ނަޝީދު ފާޑުވިދާޅުވީ ބަރުލަމާނީ ނިޒާމާ ގުޅޭ ގޮތުން ރާއްޖެޓީވީން އެމަނިކުފާނާ ކުރި ސުވާލަކާ ގުޅިގެންނެވެ.
ރައީސް އިބްރާހިމް މުހައްމަދު ސޯލިހުގެ ވެރިކަމުގެ ދައުރުގެ ތެރޭގައި ބަރުލަމާނީ ނިޒާމަކަށް ރާއްޖޭގެ ވެރިކަމުގެ ނިޒާމު ބަދަލު ކުރައްވަފާނަންތޯ ރާއްޖެޓީވީން ސުވާލު ކުރުމުން، ރައީސް ނަޝީދު ސީދާ ޖަވާބެއް ނުދެއްވައެވެ. ދެ ވަނަ ފަރަހަރަށް އެ ސުވާލު ކުރުމުން އެމަނިކުފާނު ވިދާޅުވީ ރާއްޖެޓީވީގެ ބޭނުމަކީ ސެންސޭޝަން އުފެއްދުން ކަމަށެވެ.
ނޫސްވެރިންގެ ބޭނުމަކީ ރައްޔިތުންގެ ހިތްތަކުގައި ސުވާލުތަކެއް އުފެއްދުން ކަމަށާއި ނަމަވެސް އެމަނިކުފާނު އެ ދަރަޖައަށް ވަޑައިނުގަންނަވާނެ ކަމަށް ރައީސް ނަޝީދު ވިދާޅުވިއެވެ.
"އަޅުގަނޑަށް ވެސް އިނގޭ ތިބޭފުޅުން [ރާއްޖެޓީވީ] ބޭނުންވެވަޑައިގަންނަވަނީ ސެންސޭޝަންކަން. ރާއްޖެޓީވީގެ ބޭނުމަކީ ހިޔާލުތަފާތު ކުރުމާއި ނަފްރަތު އުފެއްދުމާއި ފޯލްޓް ލައިނެއް ގެނައުން ކަން. އެހެން ނަމަވެސް ގަބޫލުކުރައްވާ، ދެނެވަޑައިގަންނަވާ އަޅުގަނޑުމެންގެ އަތް ވެސް ނުގުޑާނެ. އަޅުގަނޑާއި އިބްރާހިމް މުހައްމަދު ސޯލިހާއި ތިބޭނީ މިހެން [އަތުގެ އިޝާރާތުން ޝަހާދަތް އިނގިއްޔާއެކު ދެ އިނގިލި ދައްކާލަދެއްވައި، ދެބޭފުޅުން ތިއްބަވާނީ އެކުގައި ކަމަށް އިޝާރާތް ކުރެއްވި]،" ރާއްޖެޓީވީއަށް ފުރަތަމަ ފަހަރަށް ފާޑުވިދާޅުވެ ވާހަކަފުޅު ދައްކަވަމުން ރައީސް ނަޝީދު ވިދާޅުވިއެވެ.
"އަޅުގަނޑަށް އިނގޭ ނޫސްވެރިން ބޭނުންވެވަޑައިގަންނަވަނީ ރައްޔިތުންގެ ހިތްތަކުގައި ބައިވަރު ސުވާލުތަކެއް އުފެއްދުމަށް ކަން. އަދި ތިބޭފުޅުން ދެކެވަޑައިގަންނަވާ ނޫސްވެރިކަމުގެ ތެރޭގައި، އެއީ ރަނގަޅު ކަމަކަށް ވެސް ވެދާނެ. އެހެން ނަމަވެސް އަޅުގަނޑެއް އެ ދަރަޖައަކަށް ނުދާނަން."
މިއީ ރާއްޖެޓީވީގެ ހަތް އަހަރުގެ ދުވަހުގެ ތާރީހުގައި، ފުރަތަމަ ފަހަރަށް ރައީސް ނަޝީދު ރާއްޖެޓީވީއަށް ފާޑުވިދާޅުވެ ވާހަކަފުޅު ދެއްކެވި ފުރަތަމަ ފަހަރެވެ.
