އިންތިޚާބު ކާމިޔާބު ކުރެއްވީވެސް އިބޫ، ހުވައި ކުރެއްވީވެސް އިބޫ!

އެއީ މީގެ ދެ ތިން މަހެއްހާ ދުވަސް ކުރިއެވެ. ރިޔާސީ އިންތިޚާބު ބޯމަތިވަމުން އައިއިރު އެންމެ ބާރަށް އިވެމުންދިޔަ ވާހަކައަކީ ވަރަށް ތަފާތު ވާހަކައެކެވެ. ޤަބޫލުކުރަން ދަތި ވާހަކައެކެވެ. ބަޔަކު ވަރަށް ބާރާއި އާރުގައި ދައްކަމުންދިޔަ ވާހަކައެކެވެ. މާތްވެގެންވާ އިސްލާމްދީނާއި ދިވެހިރާއްޖޭގެ ޤާނޫނު އަސާސީ އާއި ޤާނޫނުތަކާއި އެންމެހާ އިންސާނީ ހަމަތަކުގެ ބޭރުން އެ މީހުން އެވާހަކަ ދެއްކީ ވަރަށް ފަޚުރުވެރިކަމާ އެކު އެހާމެ ހެވިފައި ތިބެގެންނެވެ. އަޑުއަހަން ތިބި އެހެންމީހުންނަށް މަލާމާތް ކުރާ ގޮތަކަށެވެ. ހަޖޫ ޖަހާ ރާގަކަށެވެ.

ފަތުއަޑުކިޔާފައި އިވެމުންދިޔަ އެ ވާހަކައަކީ ވޯޓުން މޮޅުވެ އިންތިޚާބު ކާމިޔާބު ކުރާނީ އިބޫ ކަމަށެވެ. އެކަމަކު ހުވާ ކުރާނީ ޔާމިން ކަމަށެވެ.

ރައީސް ޔާމީނަށް އޮތް އާރާއި ބާރާ އެކު އެވާހަކަތައް ދައްކަމުންދިޔައިރު ގުޅިފައިވާ ޕާޓީތަކުގެ މީހުން ތިބީ ބިރުން ރޫރޫއަޅައަޅައެވެ. ދެންވާނެ ގޮތާ މެދު ސުވާލު އުފެދިފައެވެ. ކިތައްމެ ގިނަ ވޯޓެއް އެޅިއަސް ދެން ކަންކުރާނެ ގޮތެއް ހިސާބަކަށް ފަހުމްވާތީއެވެ.

އެހެން ނުވާންވީ ސަބަބެއް ނެތެވެ. ރައީސް ޔާމީންގެ ބާރުވެރިކަން ވަނީ އެވަރަށް ގަދަކޮށްފައެވެ. ސުޕްރީމް ކޯޓުން ކުރި ހުކުމް ދުއްވާލީ ފަނުފުލުންނެވެ. އެއަކަށް ތަބައެއް ނުވިއެވެ. ބަދަލުކޮށްލީ އެކޯޓުގެ ބެންޗެވެ. ހައިކޯޓު އެއްކޮށް އަތްމައްޗަށް ކަހާލިއެވެ. އިންތިޚާބުގެ ކަންކަމުގައި ބަސްބުނާން އޮތީ އެދެތަން ކަމަށް ވާތީއެވެ. މިކަންކަމާއި ކުރިން ކޮށްފައިވާ ކަންކަމަށް ބަލާއިރު ރައްޔިތުންނަށް ސުވާލު އުފެދިފައި އޮތީ ލާ ވޯޓުގެ ނަތީޖާ ރަނގަޅުވާނެ ބާވައޭއެވެ. ވޯޓުން މޮޅުވިއަސް ވެރިކަން ބަދަލުވާނެ ބާވައޭއެވެ.

މި ސުވާލުތައް ހިތުގައި އޮތަސް ރައްޔިތުން ނިކުތީ އެ އަށް ވުރެ ބާރުގައެވެ. ހިތުން ހިތުގައި އެކަން އޮތް ނަމަވެސް ނުކުމެ ކުރަން ފެށީ އެ އަށް ވުރެ މާ ވަރުގަދަ މަސައްކަތެކެވެ. ވޯޓުން ފޮށިތައް ފުރާލިއެވެ. މަކަރެއް ހެދިޔަ ނުދީ ފާރަލިއެވެ. އިންތިޚާބުގެ ނަތީޖާ ބަދަލު ނުކުރެވޭ ވަރަށް ބޮޑުތަނުން ރައީސް ޔާމީން ބަލިކުރިއެވެ. އެއާ އެކު ޤައުމުގައި ހިންގަފާނެ ހަމަނުޖެހުމަކަށް ފާރަލައި އެކަން ވެސް ފެއިލްކޮށްލިއެވެ.

އިންތިޚާބުގެ ނަތީޖާ ނުބައި ގޮތަކަށް އިއުލާން ނުކުރެވުނީމާ ދެން ފެށީ ކޯޓު ތެރެއިން އެކަން ކުރާށެވެ. ނަތީޖާ ޤަބޫލު ނުކޮށް ސުޕްރީމް ކޯޓަށް މައްސަލަ ހުށަހެޅިއެވެ. ދެން ވެސް ރައްޔިތުން ދުލެއް ނުދިނެވެ. ފުލުހުންނާ ސިފައިން ވެސް ރައްޔިތުންގެ ބަހަށް އެނބުރިއްޖެއެވެ. ރައްޔިތުންގެ ނިންމުމާ ދެކޮޅަށް ކަމެއް ނުކުރެވޭނެ ކަމުގެ ވާހަކަ ބުނަން ފެށިއެވެ. އިސާހިތަކު ސުޕްރީމް ކޯޓުން ފަހު ބަސް އިއްވައިފިއެވެ. އިންތިޚާބުގެ މައްސަލައެއް ނެތްކަމާއި ނަތީޖާ ބަދަލު ކުރާނެ ތަނެއް ނެތް ކަމަށް ކަނޑައަޅައިފިއެވެ. ޕީޕީއެމުން ކިތައްމެ ވަރަކަށް ވޯޓު ވަގަށް ނެގިކަމަށް ގޮވިއަސް އެއީ ދޮގެއް ކަމަށް ނިންމައިފިއެވެ.

ދެން ވެސް ރައްޔިތުން ތިބީ ސުވާލެއްގެ ތެރޭގައެވެ. އަދިވެސް ފަހު ބޮނޑިއެއް ވެސް އަޅާފާނެތީއެވެ. މަރުވާން ދަމުން ފަހު ވަޒަން ފޮނުވާލާ ބީދައިންނެވެ. އެކަމަކު މި ފަހަރު ވެސް ވީ ބައްޔެވެ. ރައްޔިތުން މޮޅުވެއްޖެއެވެ. ހުވައި ކުރެއްވީ އިންތިޚާބު ކާމިޔާބު ކުރެއްވި އިބްރާހީމް މުހައްމަދު ސޯލިހެވެ. އިންތިޚާބުން ބަލިވި ރައީސް ޔާމީނެއް ނޫނެވެ. ކަންވެ ނިމުނީ ރައްޔިތުން ނިންމި ގޮތަށެވެ. ޕީޕީއެމުން ބާރުގެ ބޭނުންކޮށްގެން ބުނަމުންދިޔަ ގަދަ ބަހަކާ އެއްގޮތަކަށް ނޫނެވެ. އަމުދުން މަތިން ގަޑި ޖެހުނީމާ ގަޓްކަން ދެއްކެވި ރައީސް ޔާމީނެއް ނޫނެވެ.