ހުވާކުރުމުގެ ރަސްމިއްޔާތު ރައީސް ޔާމީން ބޮއިކޮޓް ކުރައްވައިފި
16 ނޮވެމްބަރު 2018 | ހުކުރު 18:20ރައްޔިތުންގެ ހައްޤު ގެއްލި، އިންސާފު ލިބިފައެއް ނުވޭ
ރައީސް ޔާމީން
އިންތިޚާބީ ރައީސް އިބްރާހިމް މުޙައްމަދު ސޯލިހު ރައީސުލްޖުމްހޫރިއްޔާ ކަމުގެ ހުވާކުރެއްވުމުގެ ރަސްމިއްޔާތަށް ރައީސް އަބްދުﷲ ޔަމީން ވަޑައިނުގަންނަވާނެކަމަށް އެމަނިކުފާނުގެ ތަރުޖަމާނު އިބްރާހިމް މުއާޒް އަލީ ވިދާޅުވެއްޖެއެވެ.
މި ރަސްމިއްޔަތުގައި ބައިވެރިވެވަޑައި ނުގަންނަވަން ނިންމި ސަބަބެއްކަމަށް ވިދާޅުވެފައިވަނީ، "މިއަދާ ހަމައަށް ދިވެހި ރާއްޖޭގެ ރައްޔިތުންގެ ބޮޑު ހައްގެއް ގެއްލި، އިންސާފު ނުލިބިފައިވާ ކަމަށް ގަބޫލުފުޅު ކުރެއްވޭތީ އާއި އެމަނިކުފާނަށް ތާއީދު ކުރައްވާ އެތައްް ހާސް ސަޕޯޓަރުންގެ އެދިވަޑައިގަތުމަށް އިހުތިރާމް ކުރެއްވުމުގެ ގޮތުން" ކަމަށެވެ.
ރައްޔިތުންގެ ބޮޑު ހައްގެއް ގެއްލިފައިވާކަމަށް މުއާޒް ވިދާޅުވި އިރު އެ ހައްގަކީ ކޮބައިކަމެއް ބަޔަންކޮށްދިފައެެއް ނުވެއެވެ. އެހެންނަމަވެސް ނިމިދިޔަ އިންތިޚާބުގައި ލިބުނު ނާކާމިޔާބީއާއި އެކު އިންތިޚާބުގެ ނަތީޖާ ގަބޫލުފުޅުކުރެއްވުމަށްފަހު، ފަހުން އޮޅުވާލުންތަކެއް ހުރިކަމަށް ބުނެ އިންތިޚާބު ބާތިލްކުރުމަށް ސުޕުރީމް ކޯޓަށް ހުށައެޅުމުން އެ ކޯޓުން ނިންމީ އިންތިޚާބު ބާތިލު ކުރާނެތަނެއް ނެތްކަމަށެވެ.
ހޮނިހިރު ދުވަހު މެންދުރުފަހު ގަލޮޅު ރަސްމީ ދަނޑުގައި ބާއްވަން ހަމަޖެހިފައިވާ ރައީސް ސޯލިހު ހުވާކުރެއްވުމުގެ ރަސްމިއްޔާތަށް މިހާރު އެންމެ ފަހުގެ ތައްޔަރީތައް ދަނީ ވަމުންނެވެ. މި ރަސްމިއްޔާތުގައި އިންޑިއާގެ ބޮޑުވަޒީރު ނަރެންދްރަ މޯދީ ބައިވެރިވެވަޑައިގަންނަވާނެއެވެ. އަދި މި ރަސްމިއްޔާތުގައި ބޭރުގެ 200 އަށްވުރެ ގިނަ އިއްޒަތްތެރިން ބައިވެރިވެވަޑައިގަންނަވާނެއެވެ.
