ގުޅިފައިވާ ޕާޓީތަކުގެ ހަތަރު ލީޑަރުން ފުރަތަމަ ފަހަރަށް އެއް މޭޒެއްގެ ދޮށުގައި ބައްދަލުކުރެއްވުމަށް ހަމަޖައްސައިފިއެވެ. 

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި މި ބައްދަލުވުމުގައި ކުރީގެ ރައީސް މުހައްމަދު ނަޝީދާއި ކުރީގެ ރައީސް މައުމޫން އަބްދުލް ގައްޔޫމް، ޖުމްހޫރީ ޕާޓީގެ ލީޑަރު ގާސިމް އިބްރާހިމް އަދި އަދާލަތު ޕާޓީގެ ރައީސް ޝައިހް އިމްރާން އަބްދުﷲ ބައިވެރިވެ ވަޑައިގަންނަވާނެއެވެ.

މީގެ އިތުރުން މި ބައްދަލުވުމުގައި އިންތިހާބީ ރައީސް އިބްރާހީމް މުހައްމަދު ސޯލިހު އާއި އިންތިހާބީ ނާއިބު ރައީސް ފައިސަލް ނަސީމް ވެސް ބައިވެރިވެ ވަޑައިގަންނަވާނެ ކަމަށް ވަނީ މައުލޫމާތު ލިބިފައެވެ.

މިއީ ހަތަރު ލީޑަރުންގެ އިތުރުން ރައީސް ސޯލިހު އާއި ނާއިބު ރައީސް ފައިސަލް ނަސީމް އެކުގައި ބައްދަލުކުރައްވާ ފުރަތަމަ ފަހަރަށް ވާއިރު، ބައްދަލުވުމުގައި މަޝްވަރާ ކުރުމަށް ހަމަޖެހިފައި ވަނީ ކޮން ކަންތައްތަކަކާ ބެހޭ ގޮތުން ކަމެއް އަދި ސާފެއް ނުވެއެވެ.

މި ބައްދަލުވުން އޮންނާނީ މިއަދު މެންދުރު 2:00 ގައި ހޮޓެލް ޖެންގައެވެ.