ރައީސް އަބްދުﷲ ޔާމީންގެ ސަރުކާރުގެ ސިޔާސީ މަގާމުތަކުގެ އަދަދު 600 އަށް ވުރެ އިތުރުވެ، އެ މަގާމުތަކުގައި ތިއްބަވާ ބޭފުޅުންނަށް ކުރާ ހަރަދު 266 މިލިއަން ރުފިޔާއަށް އަރައިފިއެވެ.

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައިވާ ގޮތުން ރައީސް ޔާމީންގެ ސަރުކާރުގެ ސިޔާސީ މަގާމުތަކުގެ އަދަދަކީ 689 އެވެ. އެ މަގާމުތަކުގައި ތިއްބަވާ ބޭފުޅުންނަށް 266.6 މިލިއަން ރުފިޔާ ހަރަދުވާއިރު، އެ އަދަދަކީ ކައުންސިލަރުންނާއި މަޖިލިސް މެމްބަރުންނަށް ކުރާ ހަރަދަށް ވުރެ ބޮޑު އަދަދެކެވެ. މަޖިލިސް މެމްބަރުންނާއި ކައުންސިލަރުންނަށް އަންނަ އަހަރު 195 މިލިއަން ރުފިޔާ ހަރަދުވާނެ ކަމަށް ވަނީ ލަފާކޮށްފައެވެ.

މިނިސްޓްރީތަކުގެ ތެރެއިން އެންމެ ގިނަ ސިޔާސީ މަގާމުތައް އުފައްދާފައި ވަނީ ހެލްތު މިނިސްޓްރީއަށެވެ. އެ މިނިސްޓްރީގައި 96 ސިޔާސީ މަގާމު އުފައްދާފައިވާއިރު، ދެ ވަނައަށް އެންމެ ގިނަ ސިޔާސީ މަގާމު އުފައްދާފައި ވަނީ ފޮރިން މިނިސްޓްރީގައެވެ. ފޮރިން މިނިސްޓްރީގެ ސިޔާސީ މަގާމުތައް 82 އަށް އަރައެވެ. އަދި 48 ސިޔާސީ މަގާމާ އެކު، ތިން ވަނައަށް އެންމެ ގިނަ ސިޔާސީ ބޭފުޅުން އައްޔަންކޮށްފައި ވަނީ ޔޫތު މިނިސްޓްރީއަށެވެ.

ރައީސް ޔާމީން އައްޔަންކޮށްފައިވާ ސިޔާސީ ބޭފުޅުންގެ އަދަދުތަކަށް ބަދަލު ނުގެނެސް، އެ މަގާމުތަކަށް އަންނަ އަހަރު ވެސް ހަރަދު ކުރާނެ ކަމަށް މަޖިލީހަށް ހުށަހަޅާފައިވާ ބަޖެޓުގައި ވަނީ ހިމަނާފައެވެ. ނަމަވެސް އެ އަދަދުތަކަށް މަޖިލީހުން ބަދަލު ގެނެސް، އާ ސަރުކާރަށް މަގާމުތަކަށް ކުރާ ހަރަދުތައް މަޖިލީހުން ކަނޑައަޅާނެއެވެ.

އާ ސަރުކާރުގެ ޓްރާންޒިޝަނަލް ފައިނޭންޝަން އެންޑް ޓްރެޒަރީ ކޮމެޓީގެ ޗެއާ، މުހައްމަދު ނާޝިޒު ވިދާޅުވީ ބަޖެޓުގައި އަންނަ އަހަރަށް ލަފާކޮށް, ސިޔާސީ މަގާމުތަކަށް ހަރަދު ކުރަން ޖަހާފައިވާ އަދަދަކީ ސައްހަ އަދަދެއް ނޫން ކަމަށެވެ. އިންތިހާބީ ރައީސްގެ ސަރުކާރުން ސިޔާސީ މަގާމުތައް މަދުކޮށް، ކުރާ ހޭދަ ވެސް ކުޑަ ކުރާނެ ކަމަށް ނާޝިޒު ވިދާޅުވިއެވެ.