އެސްޓީއޯ އިން ތެޔޮ ވިއްކާ އަގު ހެޔޮކޮށްފި

ދުނިޔޭގެ ބާޒާރުގައި ތެލުގެ އަގު ހެޔޮވުމާ ގުޅިގެން ތެޔޮ ވިއްކާ އަގު ހެޔޮކުރަން އެސްޓީއޯ އިން ނިންމައިފިއެވެ.

މިދިޔަ އޮކްޓޯބަރ މަހުގެ 19 ވަނަ ދުވަހު ޕެޓްރޯލާއި ޑީސަލްގެ އަގު ބޮޑު ކުރުމަށް ފަހު އަގަށް ގެނައި ބަދަލާ އެކު މިއަދުން ފެށިގެން ޑީސަލް ލީޓަރަކުން 10 ލާރި އަދި ޕެޓްރޯލް ލީޓަރަކުން 20 ލާރި ހެޔޮވާނެއެވެ.

އެހެން ކަމުން ޑީސަލް ލީޓަރެއް މިއަދުން ފެށިގެން ލިބެން ހުންނާނީ 11.99ރ. އަށެވެ. އަދި ޕެޓްރޯލް ލީޓަރެއް 11.19 ރ. އަށެވެ.

އޮކްޓޯބަރ މަހު ޕެޓްރޯލު ލީޓަރެއް ވިއްކާފައި ވަނީ 11.39ރ. އަށެވެ. އަދި ޑީސަލް ލީޓަރެއް ވިއްކާފައި ވަނީ 12.09ރ. އަށެވެ.

މީގެ އިތުރުން މިދިޔަ މެއި މަހު ވެސް ޕެޓްރޯލުގެ އަގު ވަނީ ބޮޑުކޮށްފައެވެ. އެ ފަހަރު އަގު ބޮޑުކުރީ ލިޓަރަކުން 31 ލާރިއެވެ. އެހެންވެ، މޭ 7 އިން ފެށިގެން އާދީއްތަ ދުވަހުގެ ނިޔަލަށް ޕެޓްރޯލް ލިޓަރެއް ވިއްކީ 10.42ރ. އަށެވެ.

ޑީސަލް ލިޓަރެއްގެ އަގު އެންމެ ފަހުން ބޮޑުކުރީ މިދިޔަ ޖޫން 7 ވަނަ ދުވަހުއެވެ. އޭރު ބޮޑުކުރީ ޑީސަލް ލިޓަރަކުން 10 ލާރިއެވެ. އެހެންވެ އާދީއްތަ ދުވަހުގެ ނިޔަލަށް ޑީސަލް ލިޓަރެއް ވިއްކަމުން އައީ 11.23ރ. އަށެވެ.

މިއީ މި އަހަރުގެ ތެރޭގައި ތެލުގެ އަގަށް އެސްޓީއޯ އިން ބަދަލު ގެނައި ހަތް ވަނަ ފަހަރެވެ. ތެލުގެ އަގަށް ބަދަލު ގެންނަނީ ދުނިޔޭގެ ބާޒާރުގައި ތެލުގެ އަގަށް އަންނަ ބަދަލާ ގުޅިގެން ކަމަށް އެސްޓީއޯ އިން ބުނެ އެވެ.