ނާޒުކު އޮޕަރޭޝަނަށް ފަހު ގުޅިފައިވާ އެއްމާބަނޑު ދެ ކުދިން ވަކިކޮށްފި
9 ނޮވެމްބަރު 2018 | ހުކުރު 09:41އެއްމާބަނޑު ދެ ކުދިންނަކީ ދެ އަންހެން ކުދިން
ގުޅިފައިވާ އެއްމާބަނޑު ދެ ކުދިން ވަކިކުރަން ކުރި އޮޕަރޭޝަންގެ ތެރެއިން
ބޫޓާންގެ ގުޅިފައިވާ އެއްމާބަނޑު ދެ އަންހެން ކުދިން ނާޒުކު އޮޕަރޭޝަނަކަށް ފަހު ވަކިކޮށްފިއެވެ.
ނިމާ އަދި ޑާވާ ވަކިކުރުމަށް އޮސްޓްރޭލިއާގައި 18 ޑޮކްޓަރުންނާއި، ނަރުހުން ހިމެނޭ ޓީމަކުން ކުރި މި އޮޕަރޭޝަން ކާމިޔާބުކުރިއިރު، އޮޕަރޭޝަން ކާމިޔާބުވާނެ ކަމުގެ އެއްވެސް އުންމީދެއް މީގެ ކުރިން ނެތެވެ.
އޮޕަރޭޝަނަށް 15 މަހުގެ ނިމާ އަދި ޑާވާ އޮސްޓްރޭލިއާ އަށް ގެންދިއުމަށް އެންމެ ބޮޑު ދައުރެއް އަދާކުރީ ބޫޓާންގެ ޕީޑިއާޓްރިކް ސާޖަން ޑރ. ކާމާ ޝުރޭބްއެވެ. އޮޕަރޭޝަން ޓީމުގައި ވެސް ހިމެނޭ ޑރ. ޝުރޭބް އެންމެ ފުރަތަމަ ނިމާ އަދި ޑާވާއާ ބައްދަލުވީ އެ ދެ ކުދިން އުފަންވިތާ އެއް ދުވަސް ފަހުންނެވެ.
ނިމާ އަދި ޑާވާ އުފަންވީ މިދިޔަ އަހަރުގެ ޖުލައި 13 ވަނަ ދުވަހު ބޫޓާން ރީޖަނަލް ހޮސްޕިޓަލުގައި ކުރިޔަށްދިޔަ ސިޒޭރިޔަންއަކަށް ފަހުއެވެ. ސިޒޭރިއަން ހެދިއިރު އެއްމާބަނޑު ދެ ކުދިން ލިބޭކަން އާއިލާ އަދި ޑޮކްޓަރުންނަށް އެނގުނު ނަމަވެސް އެ ދެ ކުދިން ގުޅިފައިވާ ކަމެއް ނޭގެއެވެ.
ނިމާ އަދި ޑާވާގެ އޮޕަރޭޝަން ކާމިޔާބުކަމާއެކު ނިމުނު ނަމަވެސް، އެއް މަސް ވަންދެން އެ ދެ ކުދިން ހޮސްޕިޓަލުގެ ބެލުމުގެ ދަށުގައި ތިބެންޖެހެއެވެ.
ނިމާ އަދި ޑާވާގެ އޮޕަރޭޝަނަށް 350،000 ޑޮލަރު ހޭދަވެފައިވާ އިރު، މި ފައިސާ އޮސްޓްރޭލިއާ ސަރުކާރުން ދެއްކުމަށް ވަނީ ނިންމާފައެވެ.
