އިންޑޮނޭޝިއާގެ ފްލައިޓް ސްރީވިޖަޔަރ އެއަރޕްލޭން އަށް ފަސިންޖަރަކު އެރުވި ދެ ޓަނުގެ "ދޫރިއަން" މޭވާތަކާ ހެދި ފްލައިޓްގައި ތިބި އެހެން ފަސިންޖަރުންނަށް އުނދަގޫވެ ފުރުން އެއްގަޑިއިރަށް ލަސްވެއްޖެއެވެ.
އެ ފްލައިޓްގައި ތިބި ފަސިންޖަރުން ވަނީ އެ މޭވާގެ ނުބައި ވަހާ ހެދި އުނދަގޫ ވެގެން ފްލައިޓުން ފައިބާ، އެ މޭވާ ކާގޯ ހޯލްޑް ތެރެއިން ނުނެރެނީސް ފްލައިޓަށް އަރަން ދެކޮޅު ހަދާފައެވެ.
ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަ ގޮތުގައި މީހުންގެ ޝަކުވާތަކާ ގުޅިގެން އެއަރޕޯޓުގެ ކްރޫއިން ވަނީ އެ އެތަކެތި ފްލައިޓުން ބޭރުކޮށްފައެވެ.
އެ ހާދިސާއަށް ފަހު އެއަރލައިންގެ ފަރާތުން ފަހުން ނެރުނު ބަޔާނެއްގައި ބުނެފައި ވަނީ ދޫރިއަން މޭވޭ އެއަރލައިނަށް އެރުވުމަކީ މަނާ ކަމެއް ނޫން ކަމަށެވެ. އެހެންނަމަވެސް އެ މޭވާއަކީ ނުބައި ވަސް ދުވާ މޭވާއަކަށް ވުމުން ފްލައިޓްގެ ޤަވާއިދުތަކާ އެއްގޮތްވާ ގޮތުގެ މަތިން ވަރަށް ރަނގަޅަށް ބަންދު ކުރެވިފައި ހުންނަން ޖެހޭނެ ކަމަށް ވެސް އެއަރލައިނުން ބުންޏެވެ.
ދުނިޔޭގެ ބައެއް ޤައުމުތަކުގައި، އެއްގަމު ދަތުރު ކުރާއިރު އާއި ބައެއް ހޮޓާތަކަށް ދޫރިއަން މޭވާ ވެއްދުން ވަނީ މަނާކޮށްފައެވެ. އެއީ އެއިން ދުވާ ނުބައި ވަހުގެ ސަބަބުންނެވެ. އަދި ފްލައިޓަށް އަރުވާ ނަމަ ވަސް ބޭރުނުވާނެ ގޮތަކަށް ބަންދުކުރަންޖެހެއެވެ.
