ރިޔާސީ އިންތިހާބުގައި ބޭނުން ކުރި ވޯޓު ކަރުދާހުގައި ޖެހި ފާހަގަތައް ބަދަލުވި ކަމަށް ބުނެ، ސަރުކާރު ހިންގާ ޕާޓީ، ޕީޕީއެމުން ފެތުރި ވާހައަކީ ދޮގެއްކަން ސާބިތު ކުރުމަށް ނޫސްވެރިންނަށް ވޯޓު ކަރުދާސްތައް ދައްކައި، ފާހަގަ ޖަހަން ފުރުސަތު ދީފިއެވެ.
ނޫސްވެރިންނަށް ވޯޓު ކަރުދާސްތައް ދައްކައި، ވޯޓު ކަރުދާހުގައި ފާހަގަ ޖަހަން ފުރުސަތު ދިނުމަށްފަހު، އެ ކޮމިޝަނުން ވަނީ ވޯޓު ކަރުދާހުގެ ސެކިއުރިޓީ ފީޗާސްތައް ވެސް ދައްކާފައެވެ. އަންގާރަ ދުވަހު އިލެކްޝަންސް ކޮމިޝަނުން ބޭއްވި ޕްރެސް ކޮންފަރެންސަށް ފަހު، ނޫސްވެރިންނަށް ދައްކާފައި ވަނީ ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިހާބުގައި ބޭނުން ނުކޮށް ހުރި ވޯޓު ކަރުދާސްތަކެވެ. އަދި އެ ކަރުދާސްތަކުގައި ނޫސްވެރިން ލައްވައި ފާހަގަ ޖެހުމަށްފަހު، ވޯޓު ކަރުދާހުގައި ޖަހާ ފާހަގައަށް ބަދަލެއް ނާންނަކަން އިލެކްޝަންސް ކޮމިޝަނުން ކަށަވަރުކޮށްދިނެވެ.
ނޫސްވެރިންނަށް ވޯޓު ކަރުދާސް ދައްކާފައި ވަނީ އިންތިހާބުގެ ނަތީޖާ ގަބޫލު ނުކޮށް، ޕީޕީއެމުން ބޭއްވި ސިލްސިލާ މުޒާހަރާތަކުގައި ވޯޓު ކަރުދާހުގައި ރައީސް ޔާމީންގެ ނަމާ ދިމާގައި ޖެހި ފާހަގަ، އިންތިހާބީ ރައީސް އިބްރާހިމް މުހައްމަދު ސޯލިހުގެ ނަމާ ދިމާއަށް ބަދަލުވި ކަމަށް ބުނެ އަޑު އުފުލާފައި ވަނިކޮށެވެ. ސިލްސިލާކޮށް، ޕީޕީއެމް އޮފީސް ކުރިމަތީގައި 22 ރޭ ކުރިއަށް ގެންދިޔަ ޕީޕީއެމްގެ މުޒާހަރާތަކުގައި އެންމެ ބޮޑަށް އެ ވާހަކަ ދައްކަވާފައި ވަނީ ރައީސް އޮފީހުގެ ސްޕޯކްސްޕާސަން އިބްރާހިމް މުއާޒު އަލީއެވެ.
ނޫސްވެރިންނަށް ވޯޓު ކަރުދާސް ދެއްކުމުގެ ކުރިން، ބޭއްވި ޕްރެސް ކޮންފަރެންސްގައި އިލެކްޝަންސް ކޮމިޝަންގެ ރައީސް އަހުމަދު ޝަރީފު ވިދާޅުވީ ރިޔާސީ އިންތިހާބުގައި ބޭނުންކޮށްފައިވާ ވޯޓު ކަރުދާސް ނޫސްވެރިންނަށް ކުރިން ނު ދެއްކީ، ކޯޓު އަމުރެއް ނެތި އެކަން ނުކުރެވޭނެތީ ކަމަށެވެ.
"[ރިޔާސީ އިންތިހާބުގައި] ބޭނުންކޮށްފައި ހުރި ކަރުދާސް ކޯޓު އަމުރެއް ނެތި ދެއްކުމަކީ ރަނގަޅު ކަމެއް ނޫން ކަމަށް އަޅުގަނޑުމެންނަށް ލީގަލް އޮޕީނިއަން އައީ. ފަހުގެ މަރުހަލާއެއްގައި އެއީ ސަގާފަތެއްގެ ގޮތުގައި ކޮންމެހެން ކުރަންޖެހިދާނެ ކަމެއް ކަމަށް ބަލާފައި. އަނެއްކާ އިތުރު މައްސަލަތަކެއް މީގެ ތެރެއިން ނުކުތުމަކީ [އޮތް ކަމެއް]. އެކި މީހުން ވޯޓު ކަރުދާސް ދެކޭނީ އެކި ގޮތަށް،" އިލެކްޝަންސް ކޮމިޝަންގެ ރައީސް ވިދާޅުވިއެވެ.
