ޖާނުން ފިދާވެގެން ހަމަލާއެއް ދޭން ރޭވި ދެ މީހުން ބަންދުން ދޫކޮށްލައިފި
ޝަރީއަތް ނިމެންދެން ބަންދުން ދޫކޮށްލީ ވަކި ޝަރުތުތަކާއެކު
ޓެރަރިސްޓް ހަމަލާއެއް ދޭން އުޅުނު ކަމަށް ބުނާ ދެ މީހުން ކޯޓަށް ވައްދަނީ
ޖާނުން ފިދާވެގެން ދިވެހިރާއްޖޭގައި ޓެރަރިސްޓް ހަމަލާއެއް ދޭން އުޅުނު ކަމަށް ދައުލަތުން ދައުވާ އުފުލާފައިވާ ދެ މީހުން ޝަރީއަތް ނިމެންދެން ބަންދުން ދޫކޮށްލައިފިއެވެ.
ޖާނުން ފިދާވެގެން ހަމަލާއެއް ދޭން އުޅުނު ކަމަށް ބުނެ ދައުވާ ކޮށްފައި ވަނީ، ރ. މަޑުއްވަރީ ވިލުދޮޅި އިސްހާގު އަލީ އާއި ޏ. ފުވައްމަލަކު އަލުވިމާގެ ހުސައިން އަފީފުގެ މައްޗަށެވެ.
ޝަރީއަތް ނިމެންދެން ބަންދުން ދޫކޮށްލާފައިވަނީ، ބަންދަށް ލުޔެއް ދިނުމަށް އެދެމީހުންގެ ފަރާތުން ހުށައެޅުމުންނެވެ. އެ މައްސަލާގައި މިހާރު ކުރިއަށް ދަނީ އިބްތިދާއީ މަރުހަލާއެވެ. އެދެމީހުން ޝަރީއަތް ނިމެންދެން ބަންދުން ދޫކޮށްލީ ވަކި ޝަރުތުތަކާއެކުއެވެ.
ހުސައިން އަފީފުގެ މައްޗަށް ޓެރަރިޒަމުގެ އަމަލެއް ކުރަން އުޅުމުގެ ކުށުގެ ދައުވާ ކޮށްފައިވާއިރު، އިސްހާގު އަލީގެ މައްޗަށް އުފުލާފައި ވަނީ ޓެރަރިޒަމުގެ އަމަލެއް ކުރަން ރޭވުމުގެ ކުށުގެ ދައުވާއެވެ. މި ދައުވާތައް އުފުލާފައި ވަނީ މިދިޔަ އަހަރުގެ ނޮވެމްބަރު 9 ވަނަ ދުވަހުއެވެ.
މި މައްސަލައާ ގުޅިގެން އެ މީހުން ހައްޔަރުކުރީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ.
ޖާނުން ފިދާވެގެން ދިވެހިރާއްޖޭގައި ޓެރަރިސްޓް ހަމަލާއެއް ދޭން އުޅުނު ކަން ސާބިތުވެއްޖެ ނަމަ އެ ދެ މީހުންގެ މައްޗަށް 17 އަހަރާއި 20 އަހަރާ ދެމެދުގެ ޖަލު ހުކުމެއް އަންނާނެ އެވެ.
