ބޯކޮށް ވާރޭ ވެހި ހިތަދޫ ބައެއް ސަރަހައްދުތަކުގައި ފެންބޮޑުވެއްޖެ
2 ނޮވެމްބަރު 2018 | ހުކުރު 03:17ބައެއް ގެތަކަށް ވަނީ ފެން ވަދެފައި
އައްޑޫ ސިޓީ ހަތަދޫގެ މަގެއްގައި ފެންބޮޑުވެފައި - ފޮޓޯ: އެމްއެންޑީއެފް
ބޯކޮށް ވާރޭވެހި އައްޑޫ ސިޓީ ހިތަދޫ ބައެއް ސަރަހައްދުތަކުގައި ފެންބޮޑުވެއްޖެ އެވެ.
އެމްއެންޑީއެފުން ބުނި ގޮތުގައި ބުރާސްފަތި ދުވަހުގެ ރޭ ހިތަދުއަށް ބޯކޮށް ވާރޭ ވެހި ފެންބޮޑުވުމުގެ ސަބަބުން ބައެއް ގެތަކަށް ވެސް ވަނީ ފެން ވަދެފަ އެވެ. އެ ގެތަކަށް އެހީތެރިކަން ފޯރުކޮށް ދިނުމުގެ މަސައްކަތް ހިތަދޫގައި ހުންނަ އެމްއެންޑީއެފްގެ ފަޔަރ ސްޓޭޝަންގެ ސިފައިން ހަރަކާތްތެރިވަމުން އެބަދެ އެވެ.
ބޯކޮށް ވާރޭ ވެހޭނެކަމަށް ލަފާކުރެވޭތީ ދެކުނުގެ 4 އަތޮޅަށް ޔެލޯ އެލަރޓް ވެސް ނެރުނެވެ.
މޫސުމާއި ބެހޭ ޤައުމީ އިދާރާއިން ބުރާސްފަތި ދުވަހުގެ ރޭ މެންދަމު 3:15 އިން ފެށިގެން ހުކުރު ދުވަހުގެ ހެނދުނު 7:15 އަށް ގއ. އިން ފެށިގެން ދެކުނަށް ވަނީ ޔެލޯ އެލަރޓް ނެރެފައެވެ. ބުރާސްފަތި ދުވަހުގެރޭ 11:00އިން ފެށިގެން މެންދަމު 3:00 އާއި ހަމަޔަށްވެސް ޔެލޯ އެލަރޓް އޮތީ ނެރެފައެވެ.
މި ހަފުތާތެރޭގައި މާލެއަށް ވެސް ބޯކޮށް ވާރޭ ވެހި މަގުތަކުގައި ވަރަށް ބޮޑަށް ފެންބޮޑުވި އެވެ.
