ރިޔާސީ އިންތިޚާބުގައި ރައްޔިތުން ނުކުމެ މުޅި ދުނިޔެ ސިއްސުވާލައިފި: ރައީސް ނަޝީދު
1 ނޮވެމްބަރު 2018 | ބުރާސްފަތި 14:12ރާއްޖެ ސަލާމަތުގެ އައްސޭރިއަށް ގެނެސްދިނީ ރައްޔިތުން
ރައީސް މުހައްމަދު ނަޝީދު ސަޕޯޓަރުންނާ މުހާތަބުކޮށް ވާހަކަފުޅު ދައްކަވަނީ
މިއަހަރުގެ 23 ސެޕްޓެންބަރުގައި ބޭއްވި ރިޔާސީ އިންތިޚާބުގައި ރައްޔިތުން ނުކުމެ މުޅި ދުނިޔެ ސިއްސުވާލާފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ދެ އަހަރާއި ނުވަ މަސް ފަހުން ރާއްޖެވަޑައިގެން، އެމަނިކުފާނަށް މަރުހަބާ ދެންނެވުމަށް އާޓިފިޝަލް ބީޗު ސަރަހައްދަށް އެއްވެ ތިބި އެތައް ހާސް ރައްޔިތުންނާ މުހާތަބުކުރައްވައި ވާހަކަދައްކަވަމުން ރައީސް ނަޝީދު ވިދާޅުވީ، ދިވެހިރާއްޖެ ސަލާމަތްކޮށްދީ ސަލާމަތުގެ އައްސޭރިއަށް ގެނެސްދިނީ ރައްޔިތުން ކަމަށެވެ.
ރައީސް ނަޝީދު ވިދާޅުވީ ރިޔާސީ އިންތިޚާބުގައި ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު ހޯއްދެވި ކާމިޔާބީއަކީ ދިވެހިން މުޅި ދުނިޔެއަށް ދައްކުވައިދިން ނަމޫނާ ކާމިޔާބީއެއް ކަމަށެވެ. އަދި މިއިންތިޚާބުން ރައްޔިތުން ދައްކުވައިދިނީ ދިވެހިންނަކީ އުންމީދު ނަގާލާނެ ބައެއް ނޫންކަން ކަމަށާއި، ދިވެހިންނަކީ ފަހަތަށް ޖެހޭނެ ބައެއްވެސް ނޫންކަން ކަމަށެވެ.
"ދިވެހިން މުޅި އުއްމަތަށް ދައްކާދީފި އެމީހުންގެ ހައްގު މިންވަރު އެމީހުން ހޯދާނެކަން. 23 ސެޕްޓެންބަރުގެ ދިވެހިންގެ ނަތިޖާ އެންމެ ފުރިހަމަކޮށް ހާމަކޮށްދިން ހަގީގަތަކީ ތިބޭފުޅުން ތިއެދޭ ދިވެހިރާއްޖޭގެ އުންމީދު. ތިބޭފުޅުން ތިއެދިވަޑައިގަންނަވާ ދިވެހިރާއްޖޭގެ ތަސައްވަރު. ހަގީގަތުގައި ކުރައްސަވާނީ ތިބޭފުޅުންކަން" ރައީސް ނަޝީދު ވިދާޅުވިއެވެ.
ހުދުމުހުތާރުކަމާއި، ބާރުވެރިކަމާއި، ހަރުކަށިކަމާއި، އަދި އަނިޔާވެރިކަމަކީ ރައްޔިތުން އެދޭ ކަންކަން ނޫންކަން ފާހަގަކުރައްވައި ރައީސް ނަޝީދު ވިދާޅުވީ، މިހުރިހާ ކަމަކަށް ރައްޔިތުން ހަރު އަޑުން ނޫނެކޭ ބުނެފައިވާ ކަމަށެވެ. އަދި ރައްޔިތުން އެދެނީ އިސްލާމީ ރިވެތި އުސޫލުން ހިނގާ ޑިމޮކްރެޓިކް ރާއްޖެއެއް ކަމަށް އެމަނިކުފާނު ވިދާޅުވިއެވެ. ރައީސް ނަޝީދު ވިދާޅުވީ، އެމަނިކުފާނާއި ދިވެހި ރައްޔިތުން މަސައްކަތް ފެށީ މިފަދަ ޑިމޮކްރެޓިކް ރާއްޖެއެއް އަލުން އިޔާދަ ކުރަން ކަމަށާއި، މިއުއްމީދު ހަގީގަތަކަށް ހަދާނެ ކަމަށެވެ.
