ދުނިޔޭގެ އެންމެ ބޮޑު އެއާރޕޯޓް އިސްތަންބޫލުގައި ހުޅުވައިފި

ދުނިޔޭގެ އެންމެ ބޮޑު އެއަރޕޯޓް ތުރުކީގެ އިސްތަންބޫލުގައި ހުޅުވައިފިއެވެ.

ތުރުކީގެ 95 ވަނަ ޖުމްހޫރީ ދުވަސް ފާހަގަކުރުމުގެ ގޮތުން އިސްތަންބޫލު ގްރޭންޑް އެއަރޕޯޓް ހުޅުވައިދެއްވީ ތުރުކީގެ ރައީސް ރަޖަބް ތައްޔިބް އޮރޮދުގާންއެވެ.

އެއަރޕޯޓް ހުޅުވައިދެއްވުމަށް ފަހު އޮރުދުގާން ވިދާޅުވީ މިއީ ވަރަށް އަގުހުރި މަޝްރޫއުއެއް ކަމަށާއި މިކަމުގެ ސަބަބުން ތުރުކީގެ އިގްތިޞާދު ވަރަށް ބޮޑަށް ކުރިއަރައިގެންދާނެ ކަމަށެވެ.

އަލަށް ހުޅުވި އެއަރޕޯޓާއި އެކު އަތަތާކް އެއަރޕޯޓު ޑިސެމްބަރ މަހު ބަންދުކުރުމަށް ފަހު އޭވިއޭޝަން އޮޕަރޭޝަންތައް އެއަރޕޯޓަށް ބަދަލުކުރާނެ ކަމަށެވެ.

ތުރުކީގެ ޓްރާންސްޕޯޓް މިނިސްޓަރ ޗަހިތް ތުރުހާން ވިދާޅުވީ ދުނިޔޭގެ ތިންބައި ކުޅަ އެއްބައި މީހުން އަލަށް ހުޅުވި އެއަރޕޯޓުގެ ޙިދުމަތް ހޯދާނެ ކަމަށެވެ.

ފުރަތަމަ ފިޔަވަހީގެ ދަށުން އެއްފަހަރާ ފަސް ފްލައިޓަށް ޓޭކް އޮފް، އަދި އެއް ފަހަރާ ފަސް ފްލައިޓް ލޭންޑިން ކުރިއަށް ގެންދެވޭނެއެވެ. އަދި މިފިޔަވަހީގައި އަހަރެއްގެ މައްޗަށް 90 މިލިއަން ފަތުރުވެރިންނަށް ޙިދުމަތް ފޯރުކޮށްދެވޭއިރު، އެއަރޕޯޓުގެ މަސައްކަތް ނިމުމުން ހަ ރަންވޭ ބޭނުންކޮށްގެން އަހަރެއްގެ މައްޗަށް 200 މިލިއަން ފަސިޖަރުންނަށް ޙިދުމަތް ދެވޭނެއެވެ.

މި އެއަރޕޯޓަކީ އޭޝިޔާގެ ގައުމުތަކުންނާއި ޔޫރަޕުގެ ގިނަ ފަތުރުވެރިން ޙިދުމަތް ހޯދާނެ ތަނަކަށް ވެގެންދާނެއެވެ.