ގެއްލިގެން ހޯދި ފަތުރުވެރިޔާ ފެނިއްޖެ، އެމީހާ އޮތީ މަރުވެފައި!
31 އޮކްޓޯބަރު 2018 | ބުދަ 04:33މަރުވެފައިވަނީ އުމުރުން 31 އަހަރުގެ ފިރިހެނެއް
އެމްއެންޑީއެފް ކޯސްޓްގާޑް ކަނޑުމަތީގައި ހަރަކާތްތެރިވަނީ
ކ. މާފުށިން ފިހާޅޮހި އައިލެންޑް ރިސޯރޓަށް ދަތުރު ގޮސް މޫދަށް އެރި އުޅުނު އުމުރުން 31 އަހަރުގެ ފިރިހެން ފަތުރުވެރިޔާ ފެނިފައިވާ ކަމަށާއި އެމީހާ އޮތީ މަރުވެފައި ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ ފަތުރުވެރިޔާގެ ހަށިގަނޑު ކޯސްޓްގާޑު ޑައިވަރުންނަށް ކަނޑުގެ އަޑިން ފެނިފައި ވަނީ މިއަދު 8:45 ހާއިރު ކަމަށެވެ.
އެމީހާ ރާއްޖެ އައިސް ޗުއްޓީ ހޭދަކުރަމުން ދިޔައީ ކ. މާފުށީގައެވެ. އެ މީހާ ގެއްލުނު ކަމުގެ ރިޕޯޓް އެމްއެންޑީއެފްގެ ކޯސްޓްގާރޑް މެރިޓައިމް ރެސްކިއު ކޯރޑިނޭޝަން ސެންޓަރަ (އެމްއާރުސީސީ) އަށް ލިބިފައިވަނީ އިއްޔެ 14:49 ހާއިރުއެވެ. އެ ހާދިސާގެ ރިޕޯރޓް ލިބުމާއި އެކު އެމްއެންޑީއެފް ކޯސްޓްގާޑުގެ ފާސްޓް އިންޓަރސެޕްޓަރ ކްރާފްޓް (އެފްއައިސީ) "ދޮށިމޭނާ" ގައި އެމްއެންޑީއެފްގެ ޓީމެއް އެސަރަހައްދަށް ގޮސް އެ މީހާ ހޯދުމުގެ މަސައްކަތް ފެށި ކަމަށް އެމްއެންޑީއެފް އިން ބުނެފައި ވެއެވެ.
