ރައީސް ޔާމީން ފުރާވަޑައިގެންނެވުމަށް އެއްވެސް ފަރާތަކުން އެހީތެރިވެދީގެން ނުވާނެ: ހަސަން ލަތީފް
ޔާމީން ފުރާވަޑައިގެން ދިއުމުގެ ފުރުސަތު ދިނުމަށް ދައުލަތުގެ އެއްވެސް މުއައްޒަފަކު އެހީތެރިވެވަޑައިނުގަތުމަށް ހަސަން ލަތީފް އިލްތިމާސްކުރެއްވި
އެމްޑީޕީގެ ޗެއާޕާސަން ހަސަން ލަތީފް
ރައީސް އަބުދުﷲ ޔާމީންގެ މައްޗަށް ތުހުމަތު ކުރެވޭ އަދި އަމިއްލަފުޅަށް އިއުތިރާފްވެވަޑައިގެންފައިވާ އެތައް މައްސަލަތަކެއް ހުރިއިރު އެމަނިކުފާނު ފުރާވަޑައިގެންނެވުމަށް އެއްވެސް ފަރާތަކުން އެހީތެރިވެދީގެން ނުވާނެ ކަަމަށް އެމްޑީޕީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.
ހޯމަ ދުވަހުގެ ރޭ ރާއްޖެޓީވިގެ ފަލަސުރުޚީ ޕްރޮގްރާމްގައި ވާހަކަފުޅު ދައްކަވަމުން ހަސަން ލަތީފް ވިދާޅުވީ، ރައީސް ޔާމީންގެ އިސްތަށިފުޅުގައި އެޅިފައި ހުރި މަނީ ލޯންޑެރިންއާއި، ވަައްކަމާއި ކޮރަޕްޝަނާއި އަމިއްލަފުޅަށް އިއުތިރާފްވެވަޑައިގެންފައިވާ އެތައް ބައިވަރު ވައްކަމުގެ މައްސަލަތައް ހުރި އިރު އެކަންކަމުގެ ތަހުގީގު ހިންގެއްޖެހޭ ކަމަށެެވެ.
"ރައީސް ޔާމީން ރާއްޖޭގައި ހުންނަވައިގެން ނޫން ގޮތަކަށް އެ ތަހުގީގުތައް ހިންގޭނެ ކަމަކަށް އަޅުގަނޑު ގަބޫލެއް ނުކުރަން. ރައީސް ޔާމީން ފުރާވަޑައިގެންފިކަމަށް ވަންޏާ އެ ފުރާވަޑައިގަތުމުގައި ޝާމިލްވާނެ ދައުލަތުގެ ކޮންމެވެސް މުއައްސަސާތަކެއް ވާނެ. އެ މުއައްސަސާތަކުގެ ކޮންމެވެސް މުއައްޒަފުންތަކެއް ވާނެ.އެބޭފުޅުންނާއި ދޭތެރޭ ފިޔަވަޅު އެޅެންޖެހޭނެކަމަށް އަޅުގަނޑު ގަބޫލުކުރަނި" ހަސަން ވިދާޅުވިއެވެ.
ރައީސް އަބުދުﷲ ޔާމީން ފިއްލަވައިގެން ފުރާވަޑައިގަތުމަށް އެހީވެދޭ އެންމެހާ ފަރާތްތަކާއި މެދު ފިޔަވަޅު އެޅޭނެކަމަށް ވިދާޅުވަމުން ހަސަންލަތީފް ވިދާޅުވީ، ބޭނުމަކީ އެމަނިކުފާނު ހައްޔަރުކުރުން ނޫންކަމަށާއި އެހެންނަމަވެސް ތުހުމަތު ކުރެވޭ ބޮޑެތި މައްސަލަތައް ބެލޭނީ ފުރާވަޑައިގަތުމުގެ ފުރުސަތު ނުދީ ހިފެހެއްޓުމުންކަމަށެެވެ.
ބައިތުލްމާލުން ގެއްލިފައިވާ ފައިސާއަކީ ރައީސް އަބުދުﷲ ޔާމީންގެ ޝާމިލުވުމާއި އެކު ގެއްލިފައިވާ ދިވެހިރައްޔިތުންގެ ފައިސާކަމުން މި ވަގުތަކީ ރައީސް ޔާމީން ރައްޔިތުންނަށް ޖަވާބުދާރީވާން ޖެހޭ ވަގުތަށްވުމާއި އެކު ޖަވާބުދާރީ ނުވެވޭގޮތަށް ފުރައިގެން ދިއުމުގެ ފުރުސަތު ދިނުމަށް ދައުލަތުގެ އެއްވެސް މުއައްޒަފަކު އެހީތެރިވެވަޑައި ނުގަތުމަށް ހަސަން ލަތީފް އިލްތިމާސްކުރެއްވިއެވެ.
