ބްރިޖްގެ އެއްވެސް ލޭނެއް ބަންދުކުރަން ހުއްދަ ނުދޭ ކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެ އެވެ.
މިނިސްޓަރު ޑރ. މުހައްމަދު މުއިއްޒު ކުރެއްވި ޓުވީޓެއްގައި، ބްރިޖްގެ އެއްވެސް ލޭނެއް ބަންދުކުރަން ހުއްދަ ނުދޭ ކަމަށް ވިދާޅުވިއިރު، ހައުސިން މިނިސްޓްރީން ކުރި އިއުލާނެއްގައިި ބުނެފައިވަނީ ހޯމަ ދުވަހުން ފެށިގެން ބްރިޖްގެ ބައެއް ލޭންތައް ބަންދުކުރާނެ ކަމަށެވެ.
Bridge ge evves lane eh bandhu kuraakah huhdha eh nudhen.
— Dr.Mohamed Muizzu (@MMuizzu) October 26, 2018
ހައުސިިން މިނިސްޓްރީން ކުރި އިއުލާނެއްގައި ބުނެފައިވަނީ މާލެއާއި ހުޅުލެއާއި ދެމެދު އަޅާފައިވާ 'ސިނަމާލެ ބުރިޖް'ގެ މަޝްރޫޢު ކުރިއަށް ގެންދިޔައިރު ހެދި ވަގުތީ ޕްލެޓްފޯމްގެ ޕައިލްތައް ނެގުމުގެ މަސައްކަތް ކުރުމަށްޓަކައި މާލެއިން ހުޅުލެއަށް ދަތުރުކުރާ ބައެއް ލޭންތައް ހޯމަ ދުވަހުން ފެށިގެން ބަންދުކުރާނެ ކަމަށެވެ. އަދި ލޭންތައް ބަންދު ކުރުމަށް ހަމަޖެހިފައިވާ ގޮތާއި ގުޅޭގޮތުންނާއި، ލޭން ބަންދުކުރާ ވަގުތުތަކުގައި ޓްރެފިކަށް ގެންނަ ބަދަލުތަކާއި ގުޅޭގޮތުން ޓްރެފިކް ޕޮލިހުން ޢާއްމުންނަށް މައުލޫމާތު ފޯރު ކޮށްދެމުން ދާނެކަމަށް ހައުސިންގ މިނިސްޓްރީއިން ކޮށްފައިވާ އިއުލާނުގައި ވެއެވެ.
މިނިސްޓްރީން ބުނީ ލޭން ބަންދުކުރާ ވަގުތުތަކުގައި، ޓްރެފިކް ޕޮލިސްގެ އިރުޝާދުގެ ދަށުން، ބުރިޖުގައި ދަތުރުކުރާ ފަރާތްތަކުން ބުރިޖްގެ އެހެން ލޭންތައް ބޭނުން ކުރުމަށް އެދޭ ކަމަށެވެ.
ބުރިޖް އެޅުމަށް ތައްޔާރު ކުރި ޕްލެޓްފޯމްގެ ދަގަނޑު ހޮޅިތައް ނެގުމުގެ މަސައްކަތް ކުރަމުންދާއިރު، އެސަރަހައްދު މޫދުގެ އަޑީގައި ހުރި ގިނަ އަދަދެއްގެ ދަގަނޑު ހޮޅިތަކާއި އަދި އެހެނިހެން ސާމާނުތަކެއް ވެސް އަދި އެބަހުއްޓެވެ. އެތަކެތިވެސް ނަގާނެކަމަށް ސީސީސީސީ ކުންފުނިން ވަނީ ބުނެފައެވެ. އަދި އެކަމަށް ޚާއްސަ ޕްލޭނެއް އެބައޮތްކަމަށް ވެސް އެކުންފުނިން ވަނީ ބުނެފައެވެ.
