އެޗްޑީސީގެ ސީއޯއޯ ބުންޔާމީންގެ މުސާރަ އެއް ލައްކައަށް ވުރެ ބޮޑު!
އޭނާގެ މުސާރައަކީ 102،000ރ.
އެޗްޑީސީގެ ޗީފް އޮޕަރޭޓިން އޮފިސަރު އަހުމަދު ބުންޔާމީން: ބޮޑު މުސާރައެއް ނަންގަވާ މައްސަލަ ވަނީ ފެންމަތިވެފައި
މުސާރަ އާއި އިނާޔަތްތަކާ އެކު، ކޮންމެ މަހަކު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗީފް އޮޕަރޭޓިން އޮފިސަރު (ސީއޯއޯ) އަހުމަދު ބުންޔާމީނަށް އެއް ލައްކައަށް ވުރެ ގިނަ ރުފިޔާ ދެމުންދާކަން ރާއްޖެއެމްވީއަށް އެނގިއްޖެއެވެ.
އެނގިފައިވާ ގޮތުގައި ކޮންމެ މަހަކު މުސާރަ އާއި އިނާޔަތްތަކުގެ ގޮތުގައި ބުންޔާމީނަށް 102،000ރ. އެޗްޑީސީން ދެމުން ގެންދެއެވެ. އެ މުސާރައަކީ ސަރުކާރުގެ ކުންފުންޏަކުން މުވައްޒަފަކަށް ދޭ އެންމެ ބޮޑު މުސާރަކަން ވެސް ރާއްޖެޓީވީއަށް ވަނީ އެނގިފައެވެ.
ބުންޔާމީނަށް މުސާރަ އާއި އިނާޔަތްތަކުގެ ގޮތުގައި ކޮންމެ މަހަކު 102،000ރ. ދެމުންދާއިރު، އެއީ ދައުލަތުގެ އެންމެ މަތީ ވެރިޔާ، ރައީސުލްޖުމްހޫރިއްޔާގެ މުސާރައަށް ވުރެ ވެސް ބޮޑު އަދަދެކެވެ.
ރައްޔިތުންގެ މަޖިލީހުން އެންމެ ބޮޑު މުސާރައެއްގެ ގޮތުގައި އެއް ލައްކަ ރުފިޔާގެ މުސާރަ ކަނޑައަޅާފައި ވަނީ ރައީސުލްޖުމްހޫރިއްޔާއަށެވެ.
މުސާރަ އާއި އެލަވަންސްގެ ގޮތުގައި ލައްކައަކަށް ވުރެ ގިނަ ރުފިޔާ ނަންގަވަމުން ގެންދަވާ ބުންޔާމީން ހުންނެވީ މެލޭޝިއާގައެވެ. ރާއްޖެއެމްވީއަށް އެނގިފައިވާ ގޮތުގައި މި މަހުގެ 22 ވަނަ ދުވަހު މެލޭޝިއާއަށް ވަޑައިގެންނެވި ބުންޔާމީން ވަނީ އެޗްޑީސީން ދިގު ޗުއްޓީއެއް ނަންގަވާފައެވެ.
ބޮޑު އަދަދަކުން ބުންޔާމީން، މުސާރަ ނަންގަވަމުން ގެންދަވާތީ، އޭނާގެ ބަހެއް ހޯދުމަށް ރާއްޖެއެމްވީން ކުރި މަސައްކަތް ވަނީ ނާކާމިޔާބުވެފައެވެ. ބުންޔާމީން ގެންގުޅުއްވާ ފޯން ނަމްބަރުން މެދުވެރިކޮށް ހަދާފައިވާ ވައިބާ އާއި ވަޓްސްއެޕް ވެސް އޭނާ ވަނީ ޑިއެކްޓިވޭޓް ކުރައްވާފައެވެ.
ސަރުކާރުގެ ކުންފުނިތަކުގެ ބައެއް އިސް ބޭފުޅުން، މީގެ ކުރިން އެއް ލައްކައަށް ވުރެ ގިނަ ރުފިޔާގެ މުސާރަ ކަނޑައެޅުމުން އޭސީސީން ވަނީ އެ މައްސަލަތައް ބަލާފައެވެ. އެގޮތުން އެމްޕީއެލްގެ ސީއޯއޯގެ މަގާމުގައި މަހުދީ އިމާދު ހުންނެވިއިރު، އެ ކުންފުނީގެ ބޯޑުން ފާސްކޮށްގެން އޭނާއަށް މުސާރަ އާއި އިނާޔަތްތަކުގެ ގޮތުގައި 132،000ރ. ކަނޑައެޅި މައްސަލަ ބޮޑުވެ، އޭނާ މަގާމުން ވެސް ވަކިކުރިއެވެ.
ބުންޔާމީން މެލޭޝިއާއަށް ވަޑައިގެންފައި ވަނީ ރައީސް އަބްދުﷲ ޔާމީންގެ ކެމްޕޭނަށް އެޗްޑީސީގެ މުދަލާއި ފައިސާ ހަރަދުކޮށްފައިވާ މައްސަލަ ފަޅާއަރާފައިވަނިކޮށެވެ. އެގޮތުން 30 މިލިއަނެއްހާ ރުފިޔާ އެޗްޑީސީން ރައީސް ޔާމީންގެ ކެމްޕޭނަށް ހަރަދުކޮށްފައިވާ ކަމަށް އެ ކުންފުނީގެ އިސް ބޭފުޅަކު ވަނީ ވިދާޅުވެފައެވެ. އެ މައްސަލަ އޭސީސީ އާއި އޮޑިޓާ ޖެނަރަލް ގެންދަވަނީ ބައްލަވަވަމުންނެވެ.
