ސްޓެލްކޯގެ އިސް މެނޭޖްމެންޓާއި، އިންތިހާބީ ރައީސް ބައްދަލުކުރައްވައިފި
27 އޮކްޓޯބަރު 2018 | ހޮނިހިރު 03:52ރައްޔިތުންނަށް ވެފައިވާ ހަކަތައިގެ ވައުދުތައް ފުއްދުމަށް ސްޓެލްކޯގެ ފަރާތުން ފުރިހަމައަށް އެއްބާރުލުން ދޭނެ ކަމަށް އުންމީދު ކުރަން
އިންތިހާބީ ރައީސް އިބްރާހީމް މުހައްމަދު ސޯލިހް ސްޓެލްގެ އިސްވެރިންނާއި އަދި މުވައްޒަފުންނާއި ބައްދަލުކުރުން
ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ އިސްވެރިންނާއި އިންތިހާބީ ރައީސް އިބްރާހީމް މުހައްމަދު ސޯލިހް ބައްދަލު ކުރައްވައިފިއެވެ.
މި ބައްދަލުވުމުގައި އިންތިހާބީ ރައީސް ވިދާޅުވީ އެމަނިކުފާނުގެ ސަރުކާރުގެ ސިޔާސަތުތައް ތަންފީޒު ކުރުމަށް އަދި ރައްޔިތުންނަށްވެފައިވާ ހަކަތައިގެ ވައުދުތައް ފުއްދުމަށް ސްޓެލްކޯގެ ފަރާތުން ފުރިހަމައަށް އެއްބާރުލުން ދެއްވާނެ ކަމަށް އުންމީދު ކުރައްވާ ކަމަށެވެ. އަދި ސްޓެލްކޯގެ ފަރާތުން ވަނީ އެ ކުންފުނިން ކުރަމުންދާ މަސައްކަތްތައް ސޯލިހްއާ ހިއްސާ ކުރައްވާފައެވެ.
މީގެ އިތުރުން ދެމެހެއްޓެނެވި ގޮތެއްގައި އަގުހެޔޮކޮށް ރައްޔިތުންނަށް ކަރަންޓުގެ ހިދުމަތް ފޯރުކޮށްދެވިދާނެ ގޮތްތަކާއިމެދު މަޝްވަރާ ކުރެވިފައިވާއިރު އިއާދަކުރެވެނި ހަކަތަ އޭގެ އެންމެ ފުރިހަމަ ގޮތުގައި ރައްޔިތުންނަށް ފޯރުކޮށްދިނުމަށްޓަކައި ވެސް މަޝްވަރާތަކެއް ވަނީ ކުރިއަށް ގެންގޮސްފައެވެ.
އިންތިހާބީ ރައީސް އެދިވަޑައިގެންނެވި ގޮތަށް ސްޓެލްކޯގެ ފަރާތުން ފުރިހަމަ އެއްބާރުން ދެއްވާނެ ކަމަށް އެ ކުންފުނީގެ ސީއީއޯ އަހުމަދު ޒުހޫރު ވިދާޅުވިއެވެ.
