ވޭތުވެ ދިޔަ ތަނުގައި މަޖިލީހުގެ ހާލަތު އޮތް ގޮތުން ދެރަވެ ހިތާމަކުރަން: މޫސަ
27 އޮކްޓޯބަރު 2018 | ހޮނިހިރު 03:23ކުރިން ކަމެއް ހަވާލެއް ނުކުރޭ
މަޖިލީހުގެ ނާއިބު ރައީސް މޫސާ މަނިކު ޕްރެސް ދެއްވަނީ
މަޖިލީހުގައި ނާއިބު ރައީސަށް ކަންކަން ކުރުމުގެ ފުރުސަތެއް ލިބުނީ އަދި ކިރިޔާ ކަމަށާއި މަޖިލީހުގެ ޙާލަތު ކުރިން އޮތްގޮތުން ދެރަވެ ހިތާމަ ކުރައްވާ ކަމަށް ރައްޔިތުންގެ މަޖިލީހުގެ ނާއިބު ރައީސް އަދި ހުޅުހެންވޭރު ދާއިރާގެ މެމްބަރު މޫސާ މަނިކު ވިދާޅުވެއްޖެއެވެ.
މީގެ ކުރިން މަޖިލިސް އޮތް ގޮތުން ރައްޔިތުންގެ ކަންބޮޑުވުމާއި ބޮޑެތި ފާޑުކިޔުންތައް މަޖިލީހަށް އަމާޒުވެފައިވާއިރު މިއަދު މަޖިލީހުގެ ނާއިބު ރައީސްގެ ހައިސިއްޔަތުން ކުރިން އެގޮތަށް ކަން ނުކުރެއްވީ ކީއްވެތޯ ރާއްޖެ އެމްވީން ދެންނެވި ސުވާލަށް ޖަވާބު ދެއްވަމުން މަޖިލީހުގެ ނާއިބު ރައީސް މޫސާ މަނިކު ވިދާޅުވީ "ޤާނޫން އަސާސީގެ ދެވަނަ މާއްދާގައި ބުނާ ގޮތުން އަޅުގަނޑަށް ކަންކުރެވޭ ޙާލަތަށް އަދި މިއައީ" ކަމަށެވެ.
"ކުރިން މަޖިލީހުގެ ރައީސް އަޅުގަނޑަކަށް ކަމެއް ޙަވާލެއް ނުކުރޭ. މަޖިލީހުގައި އެންމެ ކަމެއް އަޅުގަނޑާ ހަވާލުކުރީ. އެއީ ރިޔާސަތުގެ ވަށައިގެން ފެންސު ޖަހާލާ ރަނގަޅުކޮށްލުން. އެކަން އަޅުގަނޑު ކުރިން. މިއަދު އެބައޮތް ހައިސިއްޔަތެއް ކަންކަން ކުރަން،" މޫސަ ވިދާޅުވިއެވެ.
މޫސަ ވިދާޅުވީ ރައްޔިތުންގެ މަޖިލީސް ވަރަށް ބޮޑުތަނުން ވަޅުޖަހައި، މަޖިހިލީހުގެ ވާހަކަ އެ ކިގޮތަށް ދައްކައި، މަޖިލިސް އޮތީ ވަރަށް ނިކަމެތިކޮށް ކަމަށެވެ. އަދި މަޖިލީހަކީ އެހެން ވެގެންވާނެ ތަނެއް ނޫން ކަމަށާއި މަޖިލީހުގައި 15 ވަރަކަށް އަހަރު ހޭދަވެފައިވާއިރު މިފަދަ ދުވަސްތަކެއް ދެކެވަޑައި ނުގަންނަވާ ކަމަށް މޫސަ ވިދާޅުވިއެވެ.
މޫސަ ވިދާޅުވީ މަޖިލީހުގެ މެމްބަރެއްގެ ހައިސިއްޔަތުން އެކަމާ ހިތްދަތިވާ ކަމަށާއި މަޖިލީހުގެ ރައީސަށް އިހްތިރާމް ކުރުމުގެ ގޮތުން މަޤާމްގައި ހުންނެވީ ކަމަށެވެ.
"އަޅުގަނޑު ވެސް މަޖިލީހުގައި 15 ވަރަކަށް އަހަރު މި ހޭދަވަނީ. މިކަހަލަ ދުވަސްތަކެއް އަޅުގަނޑު ވެސް ނުދެކެން. އަޅުގަނޑުވެސް މަޖިލީހުގެ މެމްބަރެއްގެ ހައިސިއްޔަތުން ހިތްދަތިވޭ. މަޖިލީހުގެ ރައީސަށް އިހްތިރާމް ކުރުމުގެ ގޮތުން އަޅުގަނޑު އެބަ ހުންނަން މަޤާމުގައި. މިއަދު މިއޮތީ ރަނގަޅު އޮތޯރިޓީ ލިބިފައި،" މޫސަ ވިދާޅުވިއެވެ.
