އަބުރުގެ ގާނޫނު އުވާލަން މިއަދު ހުށަހަޅަނީ
25 އޮކްޓޯބަރު 2018 | ބުރާސްފަތި 00:21އަބުރު ގާނޫނު ބުރާސްފަތި ދުވަހު ހުށަހެޅުމަށްފަހު ދެން އޮންނަ ފުރަތަމަ ޖަލްސާއެއްގައި މިގާނޫނު ބާތިލް ވެގެންދާނެ
ރައްޔިތުން މަޖިލީހުގެ ޗެމްބަރު އެތެރެ
ރައީސް އަބްދުﷲ ޔާމިންގެ ވެރިކަމުގައި ރައްޔިތުންގެ މަޖިލީހުން ފާސްކޮށްފައިވާ "އަބުރު ރައްކާތެރިކުރުމާއި ހިޔާލުފާޅު ކުރުކުރުމުގެ މިނިވަންކަމުގެ ގާނޫނު އުވާލުމަށް ބުރާސްފަތި ދުވަހު ރައްޔިތުންގެ މަޖިލީހަށް ހުށަހަޅާނެ ކަމަށް އިންތިޚާބީ ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
ގުޅިފައިވާ އިދިކޮޅު ޕާޓީތަކުގެ ޖޮއިންޓް ޕާލިމެންޓްރީ ގްރޫޕްގެ ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ރައީސް ސޯލިހު ވިދާޅުވީ އަބުރުގެ ގާނޫނު އުވާލުމަށް ބުރާސްފަތި ދުވަހު ރައްޔިތުންގެ މަޖިލީހަށް ހުށަހެޅުމަށް ފާސްކޮށްފައިވާ ކަމަށެވެ.
ރައީސް ސޯލިހު ވިދާޅުވީ އަބުރު ގާނޫނު ބުރާސްފަތި ދުވަހު ހުށަހެޅުމަށްފަހު ދެން އޮންނަ ފުރަތަމަ ޖަލްސާއެއްގައި މިގާނޫނު ބާތިލް ވެގެންދާނެ ކަމަށެވެ.
އަބުރުގެ ގާނޫނު އުވާލަން މަޖިލީހަށް ވައްދާނެކަން ރައީސް ސޯލިހު ހާމަކުރައްވާފައިވާއިރު، އެމަނިކުފާނުގެ ވެރިކަމުގެ ފުރަތަމަ 100 ދުވަހުގެ ތެރޭގައި މިގާނޫނު އުވާލައި ނޫސްވެރިންގެ މަސައްކަތަށް ފަހި މާހައުލެއް ގާއިމް ކޮށްދެއްވާނެ ކަމަށް ވަނީ ވައުދުވެ ވަޑައިގެންފައެވެ.
މީޑިއާތަކަށް އަމާޒުކޮށް، މަޖިލިހުން ފާސް ކުރި އަބުރުގެ ގާނޫނުގެ ދަށުން ބްރޯޑްކާސްޓިން ކޮމިޝަނުން ވަނީ ނުހައްގުން ބައެއް ޗެނަލްތައް ބޮޑު އަދަދުތަކުން ޖޫރިމަނާކޮށްފައެވެ. އެގޮތުން ބްރޯޑްކާސްޓިން ކޮމިޝަނުން ވަނީ ރާއްޖެޓީވީ ހަތަރު ފަހަރަކަށް ކޮށްފައިވާ ޖޫރިމަނާގެ އަދަދު 3.7 މިލިއަން ރުފިޔާ އަށް އަރަ އެވެ.
