ޕީއެސްއެމްގެ ތިން ވެރިޔަކާ ދެކޮޅަށް އަބުރުގެ މައްސަލައެއް ފުލުހުންނަށް ހުށަހަޅައިފި
23 އޮކްޓޯބަރު 2018 | އަންގާރަ 12:11މައްސަލަ ހުށައަޅާފައި ވަނީ ޕީއެސްއެމްގެ ޚަލީލާއި، އިކްރާމް އަދި ފަޔާޒު ޔޫސުފްއާ ދެކޮޅަށް
ޕީއެސްއެމްގެ އިސްވެރިން ކަމަށްވާ އިކްރާމް އާއި، ހަލީލު..
ދައުލަތުގެ މީޑިއާ، ޕީއެސްއެމްގެ އިސް ތިން ވެރިން އެ މީޑިއާގެ ނޫސްވެރިޔާ އަފްޒަލްގެ އަބުރާ ބެހުނު މައްސަލަ ބަލައިދިނުމަށް ފުލުހަށް ހުށައަޅައިފިއެވެ.
ޕީއެސްއެމްގައި މަސައްކަތް ކުރަމުންދާ ނޫސްވެރިޔާ މުހައްމަދު އަފްޒަލްގެ އަބުރާ ބެހުނު ކަމަށް ބުނެ ފުލުހަށް މައްސަލަ ހުށައަޅާފައި ވަނީ ޕީއެސްއެމްގެ މެނޭޖިން ޑިރެކްޓަރު އިބްރާހީމް ހަލީލާއި، ޑެޕިއުޓީ މެނޭޖިން ޑިރެކްޓަރު އިކްރާމް އަބްދުއްލަތީފާއި، ޑިރެކްޓަ އޮފް ނިއުސް ފަޔާޒު ޔޫސުފާ ދެކޮޅަށެވެ.
އަފްޒަލް ބައެއް މީޑިއާތަކަށް މައުލޫމާތު ދެމުން ބުނެފައި ވަނީ އަބުރު ގެއްލޭ ގޮތަށް ފިޔަވަޅު އަޅާފައިވާތީ ފުލުހުންނަށް މައްސަލަ ހުށަހެޅިއެޅީ ހޯމަ ދުވަހު ކަމަށެވެ.
މި އަހަރުގެ ހައްޖުގެ އަޅުކަމުގައި ހުއްޓާ ވައްކަމުގެ އިލްޒާމު އޭނާގެ ބޮލުގައި އެޅުވިކަން ފާހަގަކޮށް އަފްޒަލް ބުނީ ދޮގު ތުހުމަތުތަކެއް މައްޗަށް، އޭނާ މަސައްކަތް ކުރަމުން ދިޔަ ޑިޕާޓްމަންޓުން ބޭރުކޮށް އެހެން ޑިޕާޓްމަންޓަކަށް ބަދަލުކުރީ ކަމަށެވެ. އަފްޒަލް ބޮލުގައި ވައްކަމުގެ އިލްޒާމު އަޅުވައި، ފިޔަވަޅުއެޅުމުން އިލްޒާމު އެޅުވި ސަބަބު ސާފުކުރުމަށް ތަކުރާރުކޮށް ލިޔުމުން އެދިގެން ވެސް ތުހުމަތުކުރާ މައްސަލައިގެ އެއްވެސް ތަފްސީލެއް ހިއްސާކޮށްފައި ނުވާ ކަމަށް އަފްޒަލް ބުނެއެވެ. އަދި މިއީ ބަލައިގަނެވޭނެ ކަމަށް ނޫން ކަމަށް އަފްޒަލް ބުންޏެވެ.
އަފްޒަލް މަސައްކަތް ކުރަމުން ދިޔަ ޑިޕާޓްމެންޓު ބަދަލުކުރިއިރު އޭނާ ހުރީ ޕީއެމްއެސްގެ ނިއުސްރޫމްގެ ސީނިއަ އެޑިޓަރުގެ މަގާމުގައެވެ. އަދި މިހާރު މަސައްކަތް ކުރަމުންދަނީ ޕީއެސްއެމްގެ ދަށުން ހިންގަމުން ގެންދާ ދިވެހިރާއްޖޭގެ އަޑުގެ ޕްރޮގްރާމް ޑިޕާޓްމަންޓުގެ ޕްރެޒެންޓަރ ޕްރޮޑިއުސަރެއްގެ މަގާމުގައެވެ.
ޕީއެސްއެމްގައި ފަނަރަ އަހަރަށް ވުރެ ގިނަ ދުވަސް ވަންދެން މަސައްކަތް ކޮށްފައިވާ އަފްޒަލްއާ ދެކޮޅަށް ޕީއެސްއެމުން ފިޔަވަޅު އަޅާފައިވަނީ މިދިޔަ އޯގަސްޓް މަހުގެ 27 ވަނަ ދުވަހެވެ.
