ބޫޓާންގެ އާ ބޮޑުވަޒީރަށް މޯދީ މަރުހަބާ ވިދާޅުވެއްޖެ

ބުރާސްފަތި ދުވަހު ބޭއްވި އިންތިޚާބުގައި ބޫޓާނުގެ އާ ބޮޑުވަޒީރަކަށް ހޮވި ވަޑައިގެންފައިވާ ކުޑަކަމުދާ ނިޒާމުގެ އޮޕަރޭޝަން ޑޮކްޓަރު ލޮޓޭ ޝެރިންގް އަށް އިންޑިއާގެ ބޮޑުވަޒީރު ނަރެންދުރަ މޯދީ މަރުހަބާ ވިދާޅުވެއްޖެއެވެ.

އިންޑިއާއަކީ ބޫޓާނުން އެންމެ ބޮޑަށް ދަރާފައިވާ އެއްގައުމެވެ.

ނަރެންދުރަ މޯދީ ވަނީ ލޮޓޭ ޝެރިންގަށް ފޯނުން ގުޅުއްވާ ލިބިވަޑައިގެންނވި ކާމިޔާބީއަށް މަރުހަބާ ވިދާޅުވެ އިންޑިއާއަށް ވަޑައިގެންނެވުމަށް ދައުވަތު އަރުވާފައިކަމަށް އިންޑިއާގެ ނޫސްތަކުގައި ބުނެފައެވެ. އެދައުވަތު ލޮޓޭ ޝެރިންގ ވަނީ ގަބޫލުފުޅު ކުރައްވާފައިކަމަށާއި ވަރަށް އަވަސް މުސްތަގުބަލެއްގައި އިންޑިއާއަށް ވަޑައިގަންނަވާނެކަމަށް ލޮޓޭ ޝެރިންގ ވިދާޅުވެފައިވާކަމަށް ވެސް ނޫސްތަކުގައި ވަނީ ބުނެފައެވެ.

ބުރާސްފަތިދުވަހު ބޭއްވި ބޫޓާންގެ އިންތިޚާބުގެ ވަގުތީ ނަތީޖާ ދައްކާ ގޮތުން ގާނޫނު ހަދާ މަޖިލީހުގެ 47 ގޮނޑީގެ ތެރެއިން 30 ގޮނޑި ކާމިޔާބު ކޮށްފައިވަނީ ލޮޓޭ ޝެރިންގ ނިސްބަތްވެ ވަޑައިގަންނަވާ ޑީއެންޕީއިންނެވެ.

އިންޑިއާއިން ލޮޓޭ ޝެރިންގަށް މަރުހަބާ ދަންނަވާފައިވާއިރު ފެނުން ކަރަންޓް އުފެއްދުމަށް ބޭނުންކުރާ ހައިޑްރޯ އިލެކްޓްރިކް ޕްލާންޓް ހެދުމަށް ބޭނުންވާ ބޮޑު އަދަދެއްގެ ފައިސާ އިންޑިއާއިން ވަނީ ބޫޓާނަށް ދީފައެވެ.