ދަރިންނަށް ކީރިތި ޤުރުއާން ކިޔަވައިދީ ގޭގައި ޤުރުއާން ކިޔެވުމަށް ބާރު އެޅަން ޖެހޭ: ޚުތުބާ
ފޮތުން ދަސްވާ ރީތި ޖުމްލަތަކާއި ކަލިމަތައް ފަށްފަށްކޮށް ދަސްކޮށް ދޭން ޖެހޭ
އިސްލާމީ މަރުކަޒުގައި ކުރެވުނު ހުކުރު ނަމާދުގެ ތެރެއިން
ދަރީންނަށް ކީރިތި ޤުރުއާން ކިޔަވައިދީ ގޭގައި ކީރިތި ޤުރުއާން ކިޔެވުމަށް ބާރު އެޅުމަށް ހުކުރު ޚުތުބާގައި ގޮވާލައިފިއެވެ.
"ކިޔުން، އުނގެނުމުގެ ތަޅުދަނޑި" މިމައުޟޫއަށް އިއްވި ހުކުރު ޚުތުބާގައި ބުނީ ގޭގައި ދަރިންނާއެކު ފޮތް ކިޔުމުގެ ވަގުތުކޮޅެއް ހޭދަކުރަން އާދަ ކުރަންޖެހޭ ކަމަށާއި، ފޮތުން ދަސްވާ ރީތި ޖުމްލަތަކާއި ކަލިމަތައް ފަށްފަށްކޮށް ދަސްކޮށް ދޭން ޖެހޭ ކަމަށެވެ. އޭރުން އެކުދިންގެ މައުލޫމާތުގެ އުދަރެސް ފުޅައުވެ ވިސްނުން ތޫނުވެ ބަސްކޮށާރު މުއްސަންދިވާނެ ކަމަށާއި، ދަރީންނަށް ކީރިތި ޤުރުއާން ކިޔަވައިދީ ގޭގައި ކީރިތި ޤުރުއާން ކިޔެވުމަށް ބާރު އަޅަންޖެހޭ ކަމަށް ޚުތުބާގައި ބުންޏެވެ.
ޤުރުއާން ކިޔެވުމުގެ ސަބަބުން ދަރިންގެ ހިތް އަލިވުމަށް ރޫހާނީ ގޮތުން ބާރު ހޯދައިދޭކަން ފާހަގަކުރައްވައި ޚުތުބާގައި ބުނީ އިސްލާމް ދީން ބާރުއަޅައި ދީން ހުއްދަ ކުރާ ތަފާތު ފޮތްތަކަށް ދަރީން އަހުލުވެރިކޮށް ފޮތް ކިޔުމަށް ވަގުތު ހޭދަކުރަން ޖެހޭ ކަމަށެވެ. އަދި ހުރިހާ ޒަމާނެއްގައި ވެސް އެންމެ ރަނގަޅު އެކުވެރިއަކީ ފޮތް ކަމަށެވެ.
ޚުތުބާގައި ބުނީ ލިޔުންތެރިކަމުގައި ކުރިއަރައި ދެވޭނީ ކިޔުންތެރިންނަށް ވެގެން ކަމަށާއި، ފޮތް ގިނައިން ކިޔާނަމަ ބަސްތެރިކަން ރީތިވެ ވިސްނުމާއި ފިކުރު ގުޅި ސީދާވެގެންދާނެ ކަމަށެވެ. ޚުތުބާގައި ބުނީ ދަރިންގެ ހިތްތަކުގައި އިންދަން ޖެހޭ އެންމެ މާތް އެއް އޮށަކީ ކިޔުމަށް ލޯބި ޖެއްސުން ކަމަށާއި، އިލްމުން ގަހަނާ އެޅިގެންވާ ރަނގަޅު ޖީލެއް ބިނާކުރެވޭނީ އޭރުން ކަމަށެވެ. އަދި އެންމެ ގިނައިން ކިޔަން ޖެހޭނީ ކީރިތި ޤުރުއާން ކަމަށާއި، އެންމެ ފުރަތަމަ އުނގެނެން ޖެހޭނީ ހަމަ އެފޮތް ކަމަށެވެ.
ކީރިތި ރަސޫލާ ހަދީސް ކުރެއްވި ބަސްފުޅެއްގެ މާނަގައިވޭ "ﷲގެ ފޮތުން އެކުރެއް ކިޔެވި މީހާއަށް ހެޔޮ ކަމެއް ކުރުމުގެ ސަވާބު ލިބިގެންވެއެވެ. ކޮންމެ ހެޔޮ ކަމަކަށް ދިހަ ސަވާބެވެ. އިލްމަކީ އަކީ އަކުރެއް ކަމަށް ތިމަންކަލޭގެފާނު ހަދީސް ނުކުރައްވާ ހުށީމެވެ. އެކަމަކު އަލިފަކީ އަކުރެކެވެ. ލާމަކީ އަކުރެކެވެ. އަދި މީމަކީ އަކުރެކެވެ"
ހުކުރު ޚުތުބާގައި ބުނީ ޤުރުއާން ދަސްކުރުމަކީ ވަރަށް ބޮޑު މަސްއޫލިއްޔަތެއް ކަމަށާއި، މާތްﷲ އެކަމަށް ތައުފީގު ދެއްވި މީހާއަށް އެފެށުނީ މުޅިން އައު ހަޔާތެއް ކަމަށެވެ. އޭނާގެ ކުރީގެ ހަޔާތް މިއައު ހަޔާތާ އެއްގޮތެއް ނުވާނެކަމަށެވެ. އަދި ވަރަށް ކުރު މުއްދަތެއްގެ ތެރޭގައި އިސްލާމީ ހަޟާރާތެއް ދުނިޔޭގައި ގާއިމު ކުރެވުނީ ކީރިތި ޤުރުއާންގެ ސަބަބުން ކަމަށެވެ.
