ޓްރާންސިޝަން ކޮމިޓީގެ މެންބަރުންނާ ޑރ. ޝަހީމް ބައްދަލު ކުރައްވައިފި
19 އޮކްޓޯބަރު 2018 | ހުކުރު 13:30ވެރިކަން ބަދަލުވުމުގެ މަރުހަލާއަށް އެއްބާރުލުން ދެއްވާނެކަމަށް ޝަހީމް ވިދާޅުވި
ޓްރާންސިޝަން ކޮމިޓީގެ މެންބަރުންނާ ޑރ.ޝަހީމް ބައްދަލު ކުރެއްވުން-
ވެރިކަން ބަދަލުކުރުމުގެ މަރުހަލާގެ ކަންކަން ކުރިއަށްގެންދިއުމަށް އިންތިޚާބީ ރައީސް އިބްރާހީމް މުޙައްމަދު ސާލިހުގެ ފަރާތްޕުޅުން އުފައްދަވާފައިވާ ޓްރާންސިޝަން ކޮމެޓީގެ މެންބަރުންނާއި، ދިވެހިރާއްޖޭގެ އިސްލާމިކް ޔުނިވަރސިޓީގެ ޗާންސެލަރ އަދި ރައީސް ޔާމީންގެ ރަނިންމޭޓް ޑރ. މުޙައްމަދު ޝަހީމް ޢަލީ ސަޢީދު ބައްދަލުކުރައްވައިފިއެވެ. ދިވެހިރާއްޖޭގެ އިސްލާމިކް ޔުނިވަރސިޓީގައި ބުރާސްފަތި ދުވަހު ކުރިއަށްގެންދިޔަ މި ބައްދަލުވުމުގައި ޓްރާންސިޝަން ކޮމެޓީގެ ފަރާތުން އިސްކޮށް ބައިވެރިވެވަޑައިގެންފައިވަނީ ކުރީގެ އެޑިއުކޭޝަން މިނިސްޓަރ ޑރ.މުސްތަފާ ލުތުފީއާއި، އެމްޑިޕީ ކުރީގެ ރައީސް އިބްރާހީމް އިސްމާޢީލެވެ. އިސްލާމިކް ޔުނިވަރސިޓީގެ ފަރާތުން މި ބައްދަލުވުމުގައި ޗާންސެލަރ، ޑރ.ޝަހީމްގެ އިތުރުން އެ ޔުނިވަރސިޓީގެ މެނޭޖްމަންޓުގެ އިސްފަރާތްތަކުންވެސް ބައިވެރިވެވަޑައިގެންނެވިއެވެ.
މި ބައްދަލުވުމުގައި އިސްލާމިކް ޔުނިވަރސިޓީއާއި ބެހޭގޮތުން ތައްޔާރުކޮށްފައިވާ ޕްރެޒެންޓޭޝަނެއް ޓްރާންސިޝަން ކޮމެޓީގެ މެންބަރުންނާއި ވަނީ ހިއްސާކޮށްފައެވެ. އަދި އެ ޔުނިވަރސިޓީގެ މައިގަނޑު މަސައްކަތްތަކާއި، ކުރިއަށްގެންދާ ކޯސްތަކާއި، ހާސިލުކޮށްފައިވާ ކާމިޔާބީ އަދި ކުރިއަށް ރޭވިފައިހުރި ކަންކަމާގުޅޭ މަޢުލޫމާތު އިސްލާމިކް ޔުނިވަރސިޓީގެ ފަރާތުން ޓްރާންސިޝަން ކޮމެޓީގެ މެމްބަރުންނާއި ހިއްސާކޮށްފައިވެއެވެ. މި ބައްދަލުކުރެއްވުމުގައި އިސްލާމިކް ޔުނިވަރސިޓީގެ ފަރާތުން ވެރިކަން ބަދަލުކުރުމުގެ މަރުހަލާގައި ދެއްވަންޖެހޭ ފުރިހަމަ އެހީތެރިކަމާއި އެއްބާރުލުން ދެއްވާނެކަމުގެ ޔަޤީންކަން އެ ޔުނިވަރސިޓީގެ ޗާންސެލަރ ޑރ. މުޙައްމަދު ޝަހީމް ޢަލީ ސަޢީދު ވަނީ ދެއްވާފައެވެ. މިދިޔަ ރިޔާސީ އިންތިޙާބުގައި ޕީ.ޕީ.އެމްގެ ފަރާތުން ވާދަކުރެއްވި ރައީސް ޔާމީންގެ ރަނިން މޭޓްގެ ހައިސިއްޔަތުން ޑރ. ޝަހީމްވަނީ ޕީ.ޕީ.އެމްގެ ރިޔަސީ ކެމްޕޭންގެ އިސް ސަފުގައި ހަރަކާތްތެރިވެވަޑައިގެންފައެވެ.
