ވޮލީބޯލް އެސޯސިއޭޝަން (ވީއޭއެމް) ގެ ސީނިއާ ނައިބު ރައީސްގެ މަގާމުން މުހައްމަދު ރަނޭޝް (ރަނޭ) އިސްތިއުފާ ދެއްވުމުން ހިތާމަކުރައްވާ ކަމަށް ވީއޭއެމްގެ ރައީސް މުހައްމަދު ލަތީފް ވިދާޅުވެއްޖެއެވެ.

ރާއްޖެއެމްވީ އަށް މައުލޫމާތު ދެއްވަމުން ލަތީބެ ވިދާޅުވީ، ރަނޭ އަކީ ވީއޭއެމް އަށް ވަރަށް ބޭނުންވާ މީހެއް ކަމަށާއި، އޭނާ މަގާމުން އިސްތިއުފާ ދެއްވުމުން އެކަމާ ހިތާމަކުރައްވާ ކަމަށެވެ.

ލަތީބެ ވިދާޅުވީ، ހަފްތާއަކު ފަސް ދުވަހު 10 ގަޑިއިރާއި، 12 ގަޑިއިރާ ދެމެދު ގައުމީ އެއާލައިންގައި މަސައްކަތް ކުރައްވަމުންވެސް ރަނޭ ވީއޭއެމް އަށް ކޮށްދެއްވި ހިދުމަތްތައް ބަލައިގަންނަ ކަމަށާއި، އެ ހިދުމަތްތަކަށް ޝުކުރު އަދާކުރައްވާ ކަމަށެވެ. އަދި ވޮލީއަށް ކޮންމެވެސް ގޮތަކުން ރަނޭ ހިދުމަތްކޮށްދެއްވާނެ ކަމަށް އުންމީދުކުރައްވާ ކަމަށްވެސް ލަތީބެ ވަނީ ވިދާޅުވެފައެވެ.

މިދިޔަ ހޮނިހިރު ދުވަހު ރަނޭ މަގާމުން އިސްތިއުފާ ދެއްވާފައިވާއިރު، މީޑިއާތަކަށް މައުލޫމާތު ދެއްވަމުން ރަނޭ ވިދާޅުވީ، އޭނާ މަގާމުން އިސްތިއުފާ ދެއްވީ މަސައްކަތް ކުރާނެ މާހައުލެއް ނެތުމާއި، ލީޑާޝިޕަށް ނުރަނގަޅު ނުފޫޒުތައް ވަދެފައިވާތީ ކަމަށެވެ.

އެހެންނަމަވެސް ލަތީބެ ވިދާޅުވީ ލީޑާޝިޕަށް އެއްވެސް ނުފޫޒެއް ވަދެފައިވާ ކަމުގެ މައްސަލައެއް އޭނާއާ ހިސާބަށް އައިސްފައިނުވާ ކަމަށާއި، ރަނޭ ކުއްލި ގޮތަކަށް އިސްތިއުފާ ދެއްވުމުން އެކަމާ ވަރަށް ހައިރާންވެފައި ހުންނެވި ކަމަށެވެ.

ވީއޭއެމްގެ ރައީސް ކަމަށް ލަތީބެ އިންތިހާބުވެވަޑައިގަތް ޓީމުގައި ހިމެނިގެން މަގާމުން ވަކިނުވެ މަސައްކަތުގައި ގިނަ ދުވަހު ހުންނެވީ ރަނޭ އެވެ. ރަނޭ އެންމެ ފުރަތަމަ 2016 ވަނަ އަހަރު ހަޒާންދާރެއްގެ ގޮތުގައި ލަތީފްއާ އެކު މަސައްކަތް ފެއްޓެވި ނަމަވެސް، މިދިޔަ އަހަރުގެ މާޗް މަހުގައި ސީނިއާ ނައިބު ރައީސްގެ މަގާމަށް ވަނީ އައްޔަންކޮށްފައެވެ.

ގައުމީ ޓީމުގެ ކެޕްޓަން ވެސް ކޮށްފައިވާ ރަނޭ ވަނީ ދޯހާ އޭޝިއަން ގޭމްސްގައި ގައުމީ ޓީމަށް ކުޅެފައެވެ. ބީޗް ވޮލީކޮމިޝަންގެ ޗެއާމަން ކުރި ރަނޭ އަކީ ރާއްޖޭގެ އެންމެ މޮޅު ސެޓަރުގެ މަގާމް އެތައް ފަހަރު ހޯދުމުގެ އިތުރުން 2006 ވަނަ އަހަރު ވީއޭއެމް އިން ހޮވި އެންމެ މޮޅު ވޮލީބޯޅަ ތިން ކުޅުންތެރިންގެ ތެރޭގައި ހިމެނުނު ކުޅުންތެރިއެކެވެ. އަތޮޅު ތެރޭގެ ޓީމެއް ފުރަތަމަ ފަހަރަށް ގައުމީބޯޅަ ތަށި މިލްކުރި އިރު ހިޒް ކުލަބުގެ ސެޓަރަކީ ރަނޭ އެވެ.