ރައްޔިތުންގެ މަޖިލީހުގެ އިންތިހާބު 2019: މަރޗު މަހުގެ ފަހުކޮޅު ބާއްވަނީ!
މާލެ ސީޓީ އަށް ދެ ގޮނޑި އިތުރުވޭ
މިހާރު ހިނގަމުންދާ 18 ވަނަ ރައްޔިތުންގެ މަޖިލީހުގެ މެމްބަރުން
މިހާރު ހިނގަމުންދާ 18 ވަނަ ރައްޔިތުންގެ މަޖިލިސް ނިމި، 19 ވަނަ ރައްޔިތުންގެ މަޖިލިސް އެކުލަވާލުމަށްޓަކައި ބާއްވާ، އިންތިހާބު އަންނަ މަރޗު މަހުގެ ފަހުކޮޅު ބާއްވާނެ ކަމަށާއި އެކަމަށް ތައްޔާރީ ތައް ވަމުންދާ ކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުގެ މެމްބަރު އަދި އެކޮމިޝަނުގެ ތަރުޖަމާނު އަހުމަދު އަކްރަމް "ރާއްޖެއެމްވީ"އަށް ވިދާޅުވީ އަންނަ އަހަރުގެ މާރޗު މަހުގެ ފަހުކޮޅު ބޭއްވުމުގެ ތައްޔާރީތައް ވަމުންދާއިރު، މިހާރު ކުރިއަށްދަނީ ސިޔާސީ ޕާޓީތަކާ އެކު އެކަމާ ގުޅޭ މަޝްވަރާތައް ކަމަށެވެ.
އެގޮތުން، 19 ވަނަ ރައްޔިތުންގެ މަޖިލިސް އެކުލަވާލުމަށް އިންތިހާބު ބާއްވާ އިރު، މާލެ ސިޓީއަށް ދެ ދާއިރާ އެއް އިތުރުވެ، ދެން އެކުލަވާލެވޭ މަޖިލީހަށް ދެ ގޮނޑި އިތުރުވާނެ ކަމަށް އިލެކްޝަންސް ކޮމިޝަނުން ބުނެއެވެ.
އިލެކްޝަންސް ކޮމިޝަނުން ވަނީ މާލެ ސިޓީގެ ދާއިރާތަކުގެ މެމްބަރުންނާއި ބައްދަލު ކޮށްފައެވެ. މާލޭ ސިޓީގެ ދާއިރާތަކުގެ މެމްބަރުންނާ ބައްދަލު ކުރަމުން ދަނީ މަޖިލިސް އިންތިހާބުގައި މާލެ ދާއިރާ އަށް ދެ ގޮނޑި އިތުރުކޮށް ދާއިރާތައް ބަހާލުމާ މެދު މަޝްވަރާ ކުރުމަށެވެ. އަކްރަމް ވިދާޅުވީ އެކަމުގައި ސިޔާސީ ޕާޓީތަކުން ދެކޭ ގޮތެއް ބެލުމަށް މިހާރު ޕާޓީތަކަށް އަންގާފައިވާ ކަމަށާއި މިމަހުގެ 21 ވަނަ ދުވަހުގެ ކުރިން ސިޔާސީ ޕާޓީތަކުން ޖަވާބެއް ލިބޭނެ ކަމަށެވެ.
މިހާރު ހިނގަމުންދާ 18 ވަނަ ރައްޔިތުންގެ މަޖިލީހުގެ ޖުމްލަ މެމްބަރުންގެ އަދަދަކީ 85 ދާއިރާއިން 85 މެމްބަރުންނެވެ. މާލެސީޓީގެ 12 ދާއިރާ އަކުން 12 މެމްބަރުން ހިމެނެއެވެ.
މިހާރު ހިނގަމުންދާ 18 ވަނަ ރައްޔިތުންގެ މަޖިލީހުގެ މެމްބަރުން، މެމްބަރު ކަމުގެ ހުވާ ކުރައްވާފައި ވަނީ 28 މެއި 2014 ވަނަ ދުވަހު އެވެ. އެހެންކަމުން އެ މެމްބަރުން ފަސް އަހަރުގެ ދައުރު 28 މެއި 2019 އަށް ހަމަވާނެއެވެ.
