ކުރީގެ ރައީސް މުހައްމަދު ނަޝީދު ސައުދީއަށް ކުރެއްވި ދަތުރުފުޅު ނިންމަވާލައިފިއެވެ.
މި ދަތުރުފުޅުގައި އެމަނިކުފާނުގެ ކުރީގެ ފޮރިންގ މިނިސްޓަރު އަހުމަދު ނަސީމު ވެސް ވަނީ ބައިވެރިވެވަޑައިގަނެފައެވެ.
ސައުދީ ރަސްގެފާނުގެ ދައުވަތަކަށް ކުރެއްވި މި ދަތުރުފުޅު ނިންމަވާލެއްވުމަށް ފަހު ލަންޑަނަށް އެނބުރި ވަޑައިގެންނެނީ ބުދަ ދުވަހުގެ ހެނދުނު 06:05 ގައެވެ.
މި ދަތުރުފުޅުގައި ސައުދީގެ ރަސްގެފާނު ސަލްމާން ބިން އަބްދުލްއަޒީޒު އަލް ސައުދާއި ވަލީ އަހުދު މުހައްމަދު ބިން ސަލްމާން އާ ވެސް ބައްދަލުކުރައްވާނެ ކަމަށް ކުރިން ހާމަކޮށްފައި ވެއެވެ. އެހެން ނަމަވެސް ދަތުރުގެ ތަފްސީލުތަކެއް މިހާތަނަކަށް އެއްވެސް ފަރާތަކުން ހާމައެއް ނުކުރެއެވެ.
Raees Nasheed concluded his very successful trip to Riyadh on the invitation of the Saudi Givernment and is returning to London.The special flight is estimated to land in London at 6.05 this morning Insha Allah. Grateful thanks to His Majesty and to Crown Prince
— Ahmed Naseem (@KerafaNaseem) October 16, 2018
ރައީސް ނަޝީދު ސައުދީ އަށް ވަޑައިގެންފައި މި ވަނީ ތުރުކީގައި ހުންނަ ސައުދީގެ އެމްބަސީގެ ތެރޭގައި ސައުދީ އަރަބިއްޔާގެ ނޫސްވެރިޔާ ޖަމާލް ޚަޝޯގީ މަރާލާފައިވާ ކަމަށް އަޑު ފެތުރި ސައުދީ އަށް ވަރަށް ބޮޑަށް ފާޑުކިޔުންތައް އަމާޒުވެ ފިޔަވަޅު އަޅާނެ ކަމަށް ގައުމުތަކުން އިންޒާރު ދެމުން ގެންދާ ދަނޑިވަޅެއްގައެވެ. ނޫސްވެރިންގެ ހައްގުތަކާއި އިންސާނީ ހައްގުތަކަށް ވަކާލާތު ކުރައްވާ ބޭފުޅެއްގެ ގޮތުގައި ފާހަގަކުރެވޭ ރައީސް ނަޝީދު މިކަމާ ބެހޭ ގޮތުން މިހަތަނަށް އެއްވެސް އެއްޗެއް ވިދާޅުނުވެ ސައުދީ އަށް ވަޑައިގެންނެވުމުން ގިނަ ބަޔަކު ދަނީ އެމަނިކުފަނަށް ވެސް ފާޑު ވިދާޅުވަމުންނެވެ.
ރައީސް ނަޝީދު ސައުދީއަށް ވަޑައިގެންނެވި އިރު ރިޔާސީ އިންތިހާބުގައި ކާމިޔާބު ހޯއްދެއްވި ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހަށް ސައުދީން ވަނީ މަރުހަބާ ދަންނަވާފައެވެ.
އިންތިހާބްގެ ނަތީޖާ އިއުލާން ކުރިތާ ގިނަ އިރުތަކެއް ނުވެ، ރައީސް އަބްދުﷲ ޔާމީންގެ އަނބިކަނބަލުން ވަނީ ސައުދީއަށް ވަޑައިގެންފައެވެ.
