ސްރީލަންކަން އެއަރލައިންސްގެ ހިއްސާ ބޭރު ބަޔަކަށް ވިއްކާލަނީ
ސްރީލަންކަން އެއަރލައިން އިން ޔޫރަޕަށް ކުރާ ދަތުރުތައް ވަނީ ހުއްޓާލާފައި
ސްރީލަންކަން އެއަރލައިންސް
ސްރީލަންކަން އެއަރލައިންސްގެ ހިއްސާ ބޭރު ބަޔަކަށް ވިއްކާލަން ނިންމައިފިއެވެ.
ސްރީލަންކާގެ ގައުމީ އެއަރލައިންގެ ހިއްސާ ދުނިޔޭގެ މަޝްހޫރު އެއަރލައިނަކަށް ވިއްކާލާ، ޖޮއިންޓް ވެންޗާއެއް ހެދުމަށް ފަހު އަލުން ޔޫރަޕަށް ދަތުރުތައް ފަށަން މަސައްކަތްކުރަމުންދާ ކަމަށް އެ ގައުމުގެ ޓޫރިޒަމް ޑިވެލޮޕްމަންޓް މިނިސްޓަރު ޖޯން އަމަރަތުންގާ ވަނީ ވިދާޅުވެފައެވެ. ޔުނިވަރސިޓީ އޮފް ކޮލަމްބޯގައި ބޭއްވި ފޯރަމެއްގައި އަމަރަތުންގާ ވިދާޅުވީ ސްރީލަންކަން އެއަރލައިންސަށް ދިމާވި މާލީ ދަތިކަމާ ހެދި މިހާރު ޔޫރަޕްގެ ދަތުރުތައް ހުއްޓިފައިވާ ކަމަށެވެ.
ސްރީލަންކަން އެއަރލައިންސް އިން ޔޫރަޕަށް ކުރާ ދަތުރުތައް ހުއްޓާލިޔަސް ލަންޑަނަށް އަދިވެސް ދަތުރުކުރެއެވެ.
މުޅި ދުނިޔޭގައި ވައިގެ ދަތުރުތަކުގައި ހަރަކާތްތެރިވާ އެއަރލައިންތަކުގެ ތެރެއިން ވޭތުވެދިޔަ ސެޕްޓެމްބަރު މަހު އެންމެ ވަގުތަށް ކަމޭ ހިތާ އެއަރލައިނަކަށް ސްރީލަންކަން އެއަރލައިންސް ވަނީ ހޮވިފައެވެ. ވަގުތަށް އެންމެ ފަރުވާ ބަހައްޓާ ދުނިޔޭގެ އެއަރލައިނަކަށް ސެޕްޓެމްބަރު މަހު ސްރީލަންކަން އެއަރލައިންސް ހޮވުނީ، މަތިންދާ ބޯޓުތަކުގެ ދަތުރުތަކުގެ ޑޭޓާ ބަލަހައްޓާ ކުންފުނި ފްލައިޓްސްޓެޓްސްގެ ހިސާބުތަކުންނެވެ.
ރާއްޖެއަށް މިހާރުވެސް އެންމެ ގިނަ ފްލައިޓް ދަތުރުކުރާ ބައިނަލްއަޤްވާމީ އެއަރލައިނަކީ ސްރީލަންކަން އެއަރލައިންސްއެވެ.
