ރިޔާސީ އިންތިހާބު ބާތިލު ކުރުމަށް ރައީސް އަބްދުﷲ ޔާމީން ސުޕްރީމް ކޯޓަށް ހުށަހަޅުއްވާފައިވާ މައްސަލާގައި ބާއްވާ އެންމެ ފަހު އަޑުއެހުން މިއަދުގެ 10:00 އަށް ތާވަލްކޮށްފިއެވެ.
އިއްޔެ ބޭއްވި ޝަރީއަތުގެ މަޖިލީހުގައި އުއްތަމަ ފަނޑިޔާރު ވިދާޅުވެފައި ވަނީ މިއަދު ބާއްވާ ޝަރީއަތުގެ އަޑުއެހުމުގައި ސިއްރު ހެކި ބަލައިގަތުމާމެދު ގޮތެއް ނިންމަވާނެ ކަމަށެވެ. އަދި މިއަދު އޮންނާނީ މިމައްސަލައިގެ އެންމެ ފަހު އަޑުއެހުންކަމަށް ވިދާޅުވިއެވެ.
ރައީސް ޔާމީންގެ ފަރާތުން ހުށައަޅަނީ އިލެކްޝަންސް ކަމިޝަންގެ ރައީސް އަހުމަދު ޝަރީފް އަނގޮޓިތަކެއް ރާއްޖެއިން ބޭރުން ގެނައި ކަމަށް ތުހްމަތުކޮށް އެކަން ސާބިތުކުރަން ހުށަހަޅާ ސިއްރު ތިން ހެކިންނެވެ. އަނގޮޓިތައް ގަންނަން ދިޔަ މީހާއަށް ވިސާ ވެސް ނަގައިދިނީ އީސީގެ ރައީސް އަހުމަދު ޝަރީފް ކަމަށް އައްބާސް ޝަރީފު ވަނީ ވިދާޅުވެފައެވެ. އެ ހެކިބަސް ސިއްރު ކުރަން ހުށައެޅީ ހެކިބަސް ދޭމީހުންގެ ފުރާނައަށް ނުރައްކާވެދާނެތީ ކަމަށް އޭނާ ވިދާޅުވިއެވެ. އެ ހެކިވެރިންގެ ނަންތައް ސިއްރުކުރި ކަމުގައިވި ނަމަވެސް އެ މީހުން ދީފައިވާ ބަޔާންތައް ވަނީ ޝަރީއަތަށް ހުށަހަޅައި މައްސަލާގައި ހިމެނޭ ފަރާތްތަކާ ހިއްސާކޮށްފަ އެވެ.
ސިއްރު ހެކިބަސް ނެގުމަށް ހުށައެެޅުމުން މިމައްސަލައަށް ތަދައްޚުލްވި ފަރާތްތަކުނާއި އިލެކްޝަންސް ކަމިޝަނުން ވަނީ އެކަމާއި ދެކޮޅު ހަދާފައެވެ.
މިއަދު ބާއްވާނީ މި މައްސަލައިގެ ތިންވަނަ އަޑުއެހުމެވެ.
