ވަޒީރުން އައްޔަންކުުރާނީ އެއްބަސްވެވޭ މިންގަނޑެއްގެ ތެރެއިން: ސޯލިހް
ޕާޓީތަކުން ފޮނުވާނީވެސް އެއްބަސްވެވޭ މިންގަނޑުގެ ތެރޭގައި ތިއްބެވި ބޭފުޅުންގެ ނަންތައްކަމަށް ގަބޫލުކުރެވޭ
އުފާ ފާޅުކުުރުމުގެ ހަރަކާތެއްގައި އިންތިހާބީ ރައީސާއި ނައިބް ރައީސް
ވަޒީރުންގެ މަޖިލީހަށް ބޭފުޅުން އައްޔަންކުރައްވާނީ އެއްބަސްވެވޭ މިންގަނޑެއްގެ ތެރެއިންކަމަށް އިންތިހާބީ ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
"ސަން އޮންލައިނަށް" ދެއްވި އިންޓަވިއުއެއްގައި އިންތިހާބީ ރައީސް ވިދާޅުވީ އެމަނިކުފާނުގެ ވަޒީރުންގެ މަޖިލީހުގައި ތިއްބަވާނީ ނަޒާހަތްތެރި ބޭފުޅުން ކަމަށެވެ. އެ ބޭފުޅުންވެގެންދާނީ ވެރިއަކަށްވުރެ ބޮޑަށް ރައްޔިތުންގެ ހާދިމުން ކަމަށް އިންތިޚާބީ ރައީސް ސޯލިހް ވިދާޅުވި އެވެ.
ވަޒީރުުންގެ މަޖިލީހަށް އައްޔަންކުރައްވާނެ ބޭފުޅުންނާއި ގުޅޭ ގޮތުން އިތުރަށް ވާހަކަދައްކަވަމުން އިންތިޚާބީ ރައީސް ސޯލިހް ވިދާޅުވީ އެއްބަސްވެވޭ މިންގަނޑެއްގެ ތެރެއިން ވަޒީރުންގެ މަޖިލީހަށް ބޭފުޅުން އައްޔަންކުރާއިރު، އޭގެ ތެރޭގައި ހިމެނޭނީ ނަޒާހަތްތެރިންކަމަށެވެ. އެ ބޭފުޅުން ވަނީ ހުރި މަސައްކަތްތައް ފުރިހަމަ ކުރެވޭނެ ތަޖުރިބާ ހުރި ވަޒީރުންނަށް ކަމަށް އެމަނިކުފާނު ވިދާޅުވި އެވެ.
ވަޒީރުންގެ މަޖިލީހަށް އައްޔަންކުރައްވާނެ ބޭފުޅުންގެ ނަންތައް ޕާޓީތަކުން ފޮނުވާއިރު، އެއީ ގާބިލް ބޭފުޅުންނަށްވާނެތޯ "ސަން އޮންލައިން" އިންކުރި ސުވާލަށް ޖަވާބުދެއްވަމުން އިންތިޚާބީ ރައީސް ސޯލިހް ވިދާޅުވީ ޕާޓީތަކުން ފޮނުވާ ނަންތަކަކީވެސް މިންގަނޑަށް ފެތޭ ނަންތަކަކަށްވާނެކަމަށް ގަބޫލުކުރައްވާކަމަށެވެ.
"ކެބިނެޓު ވާނީ އަޅުގަނޑު މި ދެންނެވި ކްރައިޓީރިއާ ތެރޭގައި އޮތް ރައްޔިތުންނަށް ހިދުމަތް ކުރެވޭ ގާބިލު، ނަޒާހާތްތެރި، ތެދުވެރި އަމާނާތްތެރި ބޭފުޅުން ތިއްބަވާ ކެބިނެޓަކަށް" އިބޫ ވިދާޅުވި އެވެ.
އިންތިޚާބީ ރައީސް ސޯލިހް ވިދާޅުވީ، އައު ސަރުކާރު އެކުލަވާލުމުގެ މަސައްކަތްތައްވެސް ބާރަށް ކުރިއަށްދާކަމަށެވެ.
ވެރިކަން ބަދަލުވުމުގެ މަރުހަލާގައި ފާހަގަވި ކަންތައްތަކާއި ގުޅޭ ގޮތުން ވާހަކަ ދައްކަވަމުން އިންތިޚާބީ ރައީސް ވިދާޅުވީ ސަރުކާރުގެ މިނިސްޓްރީތަކާއި، ކުންފުނިތައް އޮތީ ވަރަށް ނުރައްކާތެރި ހާލަތެއްގައި ކަމަށެވެ. އެގޮތުން ކޮރަޕްޝަނާއި، ވައްކަން އިންތިހާއަށް ގޮސްފައިވާކަމަށް އެމަނިކުފާނު ވިދާޅުވި އެވެ.
