ގޯ އެއަރގެ ދަތުރުތައް ފަށައިފި

އިންޑިއާގެ މުމްބާއީގައި ޤާއިމްކޮށް ހިންގާ ގޯ އެއަރގެ ދަތުރުތައް ރާއްޖޭގައި ފަށައިފިއެވެ. ގޯ އެއާގެ ދަތުރުތައް އާދީއްތަ ދުވަހު ރާއްޖޭގައި ފަށާފައިވާއިރު، އިންޑިއާގެ މުމްބާއީ އިން ރާއްޖޭގެ ވެލާނާ އިންޓަރނޭޝަނަލް އެއަރޕޯޓަށް މި އެއަރލައިންގެ ފުރަތަމަ ދަތުރު މިއަދު ވަނީ ކޮށްފައެވެ.

ގޯއެއަރ އަކީ އިންޑިއާގައި ފަސް ވަނަ އަށް އެންމެ ބޮޑު އެއަރލައިނެވެ. އެ އެއަރލައިންގެ ދަތުރުތައް ކުރަނީ އިކޮނޮމީ އަދި ބިޒްނަސް ކުލާހުގެ އެއަރބަސް A320 ގެ ފްލީޓަކުންނެވެ.

މުމްބާއީ އިން މާލެ އަށް އަދި މާލެ އިން މުމްބާއީ އަށް ހަފްތާއަކު ތިން ފްލައިޓް ގޯ އެއަރ އިން އޮޕަރޭޓް ކުރުމަށް ވަނީ ހަމަޖެހިފައެވެ. މުމްބާއީ ދެކޮޅު ދަތުރުގެ އަގުތައް ފެށޭނީ 242 ޑޮލަރުންނެވެ. އަދި ގޯ އެއަރގެ ފްލައިޓްތައް ދިއްލީ އިން މާލެ އަށް އަދި މާލެ އިން ދިއްލީ އަށް ހަފްތާއަކު ދެ ދަތުރު ކުރުމަށް ހަމަޖެހިފައިވާ އިރު ޓިކެޓްގެ އަގަކީ 274 ޑޮލަރެވެ.

ގޯ އެއަރއަކީ އިންޑިއާގެ މަޝްހޫރު ވަދީއާގެ ގްރޫޕްގެ ކުންފުންޏެކެވެ. އެ އެއަރލައިން އުފައްދާފައި ވަނީ 2005 ވަނަ އަހަރުއެވެ. ފާއިތުވި މުއްދަތުގެ ތެރޭގައި އެ އެއަރލައިން އޮޕަރޭޓް ކުރަމުން ދިޔައީ އެތެރޭގެ އުދުހުން ތަކުގައެވެ.

ރާއްޖެ ހިމެނޭ ގޮތަށް ނުވަ ގައުމަކަށް ދަތުރުކުރުމުގެ ހުއްދަ 2016 ވަނަ އަހަރުގެ ތެރޭގައި ގޯ އެއަރ އަށް ދީފައި އޮތް ނަމަވެސް، މިހާތަނަށް އަދި ބޭރުގެ ގައުމުތަކަށް ދަތުރުތައް ނުފަށައެވެ. މުމްބާއީ އާއި ރާއްޖެއާ ދެމެދު ފަށާ ދަތުރުތަކަކީ ބޭރުގެ ގައުމަކަށް އެ އެއަރލައިނުން ފަށާ ފުރަތަމަ ދަތުރުތަކެވެ.

ޖުމްލަ 31 މަތިންދާބޯޓުގެ ފްލީޓެއް އޮންނަ ގޯ އެއަރ އިން ރާއްޖެއަށް ދަތުރުތައް ފެށުމާއެކު އެ އެއަރލައިން ވެގެންދާނީ ބޭރުގެ މަންޒިލްތަކަށް ދަތުރުކުރާ އިންޑިއާގެ ހަވަނަ އެއަރލައިނަށެވެ. މިހާރުވެސް، އެއަރ އިންޑިއާ އާއި، އަލް އެކްސްޕްރެސް، ޖެޓް އެއަރވޭސް، އިންޑިގޯ، އަދި ސްޕައިސް ޖެޓުން ދަނީ ބޭރުގެ މަންޒިލްތަކަށް ދަތުރު ކުރަމުންނެވެ.

ގޯ އެއަރގެ ޖީއެސްއޭ އޭޖެންޓަކީ ވޮޔޭޖަސް މޯލްޑިވްސްއެވެ