ވީއޭއެމް އެސޯސިއޭޝަން ކަޕުގެ ފިރިހެން ޑިވިޝަނުގެ ފުރަތަމަ މެޗުގައި ހޮނިހިރު ދުވަހުގެ ރޭ ކުޅުނު ފޯރިގަދަ މެޗުގައި ޕޮލިސް ކްލަބުން ހުޅުމާލެ ސްޕޯޓްސް ކްލަބް 3-2 ސެޓުން ބަލިކޮށް ފެށުން ރަނގަޅުކޮށްފިއެވެ.

ދެޓީމުގައިވެސް ވަރުގަދަ ކުޅުންތެރިންތަކެއް ތިބިއިރު، ވަރަށް ވާދަވެރި ކުޅުމަކަށްފަހު ފުރަތަމަ ސެޓު ގެންދިޔައީ ޕޮލިސް ޓީމުންނެވެ. އެޓީމުން އެ ސެޓު ގެންދިޔައީ 25-18 އިންނެވެ. މި ސެޓުގައި އަލީ ހުޒާމް (ހުޒާންޓެ) އާއި ހަސަން ނިލާމް (ޕާޓޭ)ގެ ކުޅުން ފާހަގަކޮށްލެވެއެވެ.

އިސްމާއިލް ސާޖިދު (ކުޑަކާއްޓެ) އާއި އަޝްފާގު އާދަމް (އައްކަޅޭ) އަދި މުހައްމަދު އަހުސަން (ސޮއްޓި) ހިމެނޭ ހުޅުމާލޭ ޓީމުން ދެވަނަ ސެޓު ގެންދިޔައީ 24-26 އިންނެވެ.

ތިންވަނަ ސެޓުގައި ހުޅުމާލޭ ޓީމުން ވަނީ ގިނަ ގޯސްތަކެއް ހަދާފައެވެ. އޭގެ ފައިދާ ނަގައި ޕޮލިހުން މި ސެޓު ގެންދިޔައީ 25-21 އިންނެވެ. މި ސެޓުގައި ޕޮލިހުގެ ސެޓަރު ހުސެއިން ވިޝާމް (ބުޅިކެ)ގެ ތަފާތު މޮޅު ކުޅުމެއް ފެނިގެންދިޔައެވެ.

ހުޅުމާލެ ޓީމުން ހަތަރު ވަނަ ސެޓަށް ނުކުމެ ރަނގަޅު ކުޅުމެއް ދައްކައި 21-25 އިން ސެޓު ގެންދިޔަ އެވެ. މި ސެޓުގައި ކުޑަކާއްޓެ އާއި ހުސެއިން ރައްޒާންގެ ޝޮޓުތައް ހުއްޓުވަން ޕޮލިހަށް އުނދަގޫވި އެވެ.

ދެ ޓީމު އެއްވަރުވެ ނަތީޖާ ނެރެން ކުޅުނު ފަސް ވަނަ ސެޓު ދިޔައީ ވަރަށް ވާދަވެރިކޮށެވެ.

ސެޓުގެ ބޮޑުބައި ދެ ޓީމު ހަމަހަމަކޮށް ދިޔައިރު ފަހު ކޮޅުގައި ޕޮލިހުން ކުރި ހޯދީ އެ ޓީމުގެ ބިދޭސީ ކުޅުންތެރިއާ ޕާކިސްތާނުގެ މުރާދު ޖީހާންގެ މޮޅު ކުޅުމާ އެކު އެވެ.

މުރާދުގެ ބާރު ޝޮޓުތަކާ އެކު ޕޮލިހުން މި ސެޓު ގެންދިޔައީ 15-13 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ މުރާދެވެ.