ރައްޔިތުންގެ ވޯޓް ފޭރިގެންފި ނަމަ މަޑަކުން ނުތިބޭނެ: ހަސަން ލަތީފް
2013 ވަނަ އަހަރުގެ އިންތިޚާބުގައި ކަންކުރި ފަނޑިޔާރުން މިހާރު ތިބިތަން ސުޕްރީމް ކޯޓުގެ ފަނޑިޔާރުންނަށް އެނގިވަޑައިގަންނަވާނެ
އެމްޑީޕީގެ ޗެއާޕާސަން ހަސަން ލަތީފް
ސެޕްޓެމްބަރު 23 ވަނަ ދުވަހު އެއް ލައްކަ ތިރީސް ހަތަރު ހާހަށްވުރެ ގިނަ މީހުން ވޯޓުލީ އިންސާފް ހޯދުމަށް ކަމަށާއި ސުޕްރީމް ކޯޓުން ވިއަސް އެވޯޓު ފޭރިގެންފި ނަމަ ރައްޔިތުން ދެން މަޑަކުން ނުތިބޭނެ ކަމަށް އެމްޑީޕީގެ ޗެއަރޕާސަން ހަސަން ލަތީފް ވިދާޅުވެއްޖެއެވެ.
ނިމިދިޔަ އިންތިޚާބުގައި ގުޅިފައިވާ ޕާޓީތަކަށް ލިބުނު ކާމިޔާބީ ފާހަގަ ކުރަން ރ ރަސްމާދޫ ޒުވާނުން އިސްނަގައިގެން ހުކުރު ދުވަހުގެރޭ ބޭއްވި ޚާއްޞަ ހަފްލާގައި ހަސަން ލަތީފް ވިދާޅުވީ އިންތިހާބު ބާތިލްކުރަން ރައީސް ޔާމީން ކޯޓަށް ވަޑައިގެން އުޅުއްވާތީ ރައްޔިތުންގެ ފަރާތުން ވަރަށް ބައިވަރު ސުވާލުތައް އަންނަ ކަމަށާއި ދެންވާނީ ކިހިނެއްތޯ ކޮންމެ މީހަކު ވެސް އަހަމުންދާ ކަމަށެވެ.
"ވާގޮތް ވަރަށް ސާފު. ސުޕްރީމް ކޯޓަކުންނެއް އަޅުގަނޑެއް އުއްމީދެއް ނުކުރަން ރައްޔިތުންގެ ވޯޓު ބޮލާލާ ޖަހައި މި އިންތިޚާބަކީ ބާތިލް އިންތިޚާބެއް ކަމަކަށް ނިންމަވާނެ ކަމަކަށެއް." ހަސަން ލަތީފް ވިދާޅުވިއެވެ.
ހަސަން ލަތީފް ވިދާޅުވީ 2013 ވަނަ އަހަރު ކަންވީ ގޮތުން ބައެއް މީހުންނަށް ޤަބޫލުކުރަން ދަތިވެދާނެ ކަމަށެވެ. ނަމަވެސް އޭރު ކަންކަން ހިނގި ގޮތާއި މިހާރު ކަންކަން ހިނގާ ގޮތް ވަރަށް ތަފާތު ކަމަށާއި 2013 ވަނަ އަހަރުގެ އިންތިޚާބުގެ ކަންކަން ނިންމެވި ސުޕްރީމް ކޯޓުގެ ފަނޑިޔާރުން މިހާރު ތިއްބެވި ތަން، ސުޕްރީމް ކޯޓުގެ ފަނޑިޔާރުންނަށް އޮޅިވަޑައިގެންފައި ވާނެ ކަމަށް ޝައްކު ނުކުރައްވާ ކަމަށެވެ.
ހަސަން ލަތީފް ވިދާޅުވީ ރައީސް ޔާމީނަށް ހެޔޮ ކަމެއް ކޮށްދީފި ކޮންމެ މީހަކަށް ޤާނޫނުގެ ތެރެއިން ވިޔަސް އަދި ޤާނޫނުގެ ބޭރުންވިއަސް ނިމެނީ ޖަލުން ކަމަށާއި މިކަންކަން މިހާރު ތިއްބެވި ސުޕްރީމް ކޯޓުގެ ފަނޑިޔާރުން ހަނދުމަފުޅު ހުންނާނެކަމަށް ޤަބޫލު ކުރައްވާކަމަށް ހަސަން ލަތީފް ވިދާޅުވިއެވެ. ހަސަން އެކަން ފާހަގަ އެ ކުރެއްވީ ސުޕްރީމް ކޯޓުގެ ކުރީގެ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ޖަލަށް ލާފައިވާތީ އެވެ.
ހަސަން ލަތީފް ވިދާޅުވީ އެއްލައްކަ 34 ހާސް މީހުން ވޯޓުލީ ހަމައެކަނި އިބްރާހީމް މުހައްމަދު ސޯލިހް ވެރިކަމަށް ގެންނަން ނޫންކަމަށާއި ރާއްޖޭގައި އޮތް އަނިޔާވެރިކަން ނައްތާލަން ކަމަށެވެ. އިންތިޚާބުގައި ކޮންމެ ރަށަކުން ވެސް އެދެމުން ދިޔައީ ރާއްޖޭގައި އިންސާފް ޤާއިމް ކުރުމަށް ކަމަށާއި 23 ސެޕްޓެމްބަރުގައި ރައްޔިތުން ގުޅިފައިވާ ޕާޓީތަކަށް ވޯޓު ދެއްވީ ޢަދްލު އިންސާފް ޤާއިމް ކުރުމަށް ކަމަށެވެ.
"ކޮންމެ ރަށަކުންމެ އަޅުގަނޑުމެންނަށް އިވުނު ޝަކުވާއަކީ އިންސާފް ޤާއިމްކޮށްދޭށޭ. މި އިންސާފް ޤާއިމް ކުރުމަށްލީ ވޯޓު ނާއިންސާފުން ފޭރިގަތީމާ ރައްޔިތުންނެއް ނުތިބޭނެ. ސުޕްރީމް ކޯޓުން ވިއަސް އެހެންތަނަކުން ވިއަސް މި ވޯޓާ ކުޅެފިކަމަށް ވަންޏާ އަޅުގަނޑުގެ ހިތެއް ނުބުނޭ ރައްޔިތުން ހަމަ ރީއްޗަށް ގޭގައި ތިބޭނެ ކަމަކަށެއް" ހަސަން ލަތީފް ވިދާޅުވިއެވެ.
